Meniň aýratyn minnetdarlyklarym:

• Sýuzan Martinese — onuň dileg goldawlary we kätibim hökmünde ýerine ýetiren hyzmaty üçin, onuň dostlukly kömegi we bilelikdäki dilegleri üçin.

• Ärim Maýkla, onuň söýgüsi, dilegleri we tagamly naharlary üçin.

• Özüm üçin hemişe şatlyk bolup hyzmat edýän çagalarym üçin.

• Meniň wepaly dostlaryma: çopanlar bolan Jeýk Heýforda, Raýs Bruksa, Tim Jonsona, Reý Makkolluma, Jon Roere, Jim Laffuna we Skott Bauere — olaryň dirilik beriji dilegleri we durmuşda ruhlandyryjy sözleri üçin.

• «Harwest Haus» neşirýatynyň işgärlerine: Bob Hokins-kiçä, Kerolin Makkride, Terri Glepse, Betti Fletçere, Juli Makkinnä, Tereze Ewensona, Lareý Ueýkerte, Kim Mura we Peggi Raýta — olaryň kömekleri we goldawlary üçin.

• Özleriniň başdan geçirmeleri, şatlyklary we gizlin syrlary bilen paşlaşyp, adaty we elektron poçta boýunça hatlar iberen müňlerçe aýallara.

Seniň maşgala ýagdaýyňa, teni we ruhy ýagdaýyňa, öňden bäri ynanýandygyňa ýa-da hiç-de ynanmaýandygyňa seretmezden, eger sen aýal bolsaň, onda bu kitap seniň üçündir. Men bireýýäm 30 ýyldan hem gowrak Hudaýa wepaly ynanyp gelýärin we şu güne çenli hem bu ýoldan çykmadym, ýöne şonda-da bu kitap meniň üçin wajypdyr. Çynymy aýtsam, bu kitaby men seniň üçin bolşy ýaly, özüm üçin hem ýazdym, çünki biziň ikimiz hem meňzeşdiris. Meniň durmuşym käte-käte ýeňil gezelenç bolman, gaty agyr synag bolýandyr; ol köplenç aladasyz we şatlykly bolman, howply we ýadadyjydyr. Ol ýumşak, salkyn we arassa tolkuna däl-de, güýçli we gurak şemala meňzeýändir.

Ýöne eger men durmuşymyň kynçylyklaryny Öz üstüne almaklygyny Ondan haýyş etsem, onda Hudaýyň özümiň büdür-südür ýollarymy tekiz edip, tupanlary ýatyryp, özümi we özüme gymmat bolan ähli zatlary gorap, hatda ýükümi hem ýeňilledip biljekdigini bilýändirin. Emma bu dilegsiz öz-özünden bolýan däldir.

Durmuşyň aladalarynyň tertipsizliginde biz ýeterli dileg edýän däldiris. Ýa-da iň wajyp kynçylyklarymyz hakynda dileg edip, Hudaýa ýakynlaşmaklyk, Ony çuňňur tanap, Oňa özümiziň ähli mätäçliklerimiz hakynda gürrüň bermeklik üçin wagt tapýan däldiris. Günbe-gün biz «ylgamaklykdaky dilegi» ulanmaklyk bilen, Hudaýyň patalarynyň öz durmuşymyza gelýän ýoluny ýapýandyrys. Şeýle ýagdaýda biz bir gezek özümiziň boşluk we howsalalyk duýgusy bilen oýanmagymyza mümkinçilik berýändiris; aýagymyzyň aşagyndaky toprak çägä öwrülip, gorag örtügimiz bolsa edil ýumurtganyň gabygy kimin ýuka bolup gidýän ýaly elhenç pikirler bize gün bermez.

Men öý işlerim we özümiň ýetginjek çagalarymy terbiýelemek bilen gaty meşguldym, gaty oňat aýal we hojalykçy bolmaklyga çalşardym, öz kitaplarym hakynda çykyşlar bilen ýurtda gaty kän syýahat edýärdim, ýygy-ýygydan ýygnanyşyklara gatnaýardym we ähli mätäçlere kömek ederdim, emma durmuşymdaky iň esasy zat hakynda, ýagny Hudaý bilen şahsy gatnaşyklarym hakynda ýadymdan çykarypdyryn. Men Onuň ýollaryndan ýöremekligimi bes etdirmedim, tersine, men Hudaýsyz ýekeje gün hem ýaşap bilmeýärdim. Dileg etmekligimi bes etdirmedim, tersine, men dünýädäki ähli adamlary hakynda hemişekisinden hem artyk dileg ederdim. Emma men özümiň Hudaý bilen gatnaşygym hakynda dileg etmeýärdim. Men Hudaýyň Sözüni okamaklygymy bes etdirmedim — öz etmeli işlerime laýyk gelýän aýatlary gözläp, özümiň gatnaýan mukaddes kitap sapaklaryma taýýarlanmaklyk üçin Onuň Sözüni günde ençeme sagatlap okaýardym. Emma men Hudaýyň özüm bilen gepleşmegine wagt goýmadym. Men gowy zatlar bilen şeýle bir meşguldym welin, hatda oňadyny ýitiripdirin. Muňa düşünmän, men Merýem bolmaklygyň deregine Marta bolupdyryn (Luka 10:38–42 seret).

Men Hudaý bilen özümiň şahsy gatnaşyklarymyň wagtyny gysgaltdym, netijede bolsa aladalaryň agyr ýüki astynda galyp, öňe gidip bilmedim. Men hatda sähelçe daşky täsiriň astynda hem jaýryklap bilýän näzik küýzä meňzeş boldum. Özümiň Hudaýa bolan mätäçligimiň beýleki ähli mätäçliklerimden hem ýiti we wagypdygyna düşünýärdim. Hudaýdan başga hiç kim hem meniň ruhy suwsuzlygymy gandyryp bilmezdi. Dilegdäki özümiň Hudaý bilen şahsy gatnaşygymy saklap, ony goramaklygyň neneň wajypdygyna men göz ýetirdim.

Özümiň galan ýagdaýymdan çykalga — durmuşymyň her bir tarapy we özümiň ruhda ösmekligim hakynda dileg edip, Hudaýyň wadalaryny ýadymda saklamaklykda jemlenendi. Diňe şeýle dileg Hudaýa we Onuň niýetlerine üns berip, özümiziň hususy däl-de, hut Onuň ýollaryndan ýöremekligimize kömek edýändir; bu dileg biziň öz ünsümizi wagtlaýyn zatlardan aýryp, baky zatlara öwrülmegimize kömek edýändir we diňe şonda biz hakykatdan hem wajyp zatlary görüp bilmeklik ukybyna eýe bolýandyrys. Şeýle dileg bize çyny ýalandan tapawutlandyrmagy öwredýändir, ynamymyzy berkedip, mümkin bolmadyklara ynanmagymyza kömek edýändir. Şeýle dilege görä, özümiziň bolmalymyz ýaly Hudaýyň gyzlary bolup bilýändiris we munuň mümkindigine ynanýarys.

Özümiň öňki kitaplarymda men är-aýallaryň bir-birleri hakynda, ata-eneleriň öz çagalary hakynda, raýatlaryň bolsa öz ýurtlary hakynda[1] dileg edip bilýändikleri barada gürrüň beripdim. Şu kitapda bolsa men seniň ÖZÜŇ hakynda nädip dileg edip biljekdigiňi görkezmeklige synanyşýaryn. Men seniň Göklerdäki Ata ýakyn bolmaklygyňa, Onuň mährini duýup bilmekligiňe, Onuň öňünde ýüregiňi arassalap bilmekligiňe, özüň üçin Onuň ýörite durmuşy kesgitländigine ynamly bolup bilmekligiňe, özüňi hakykatda Onuň näme maksat bilen ýaradandygyny bilmekligiňe we Onuň öňüňde goýan maksadyna ýakynlaşmaklygyň üçin Ondaky bütewiligiňi we gutarnyklylygyňy bilip bilmekligiňe men kömek etmek isleýärin. Başgaça aýdanda, men saňa özüň üçin has miweli dileg edip, Hudaý bilen has ýakyn gatnaşykda bolmaklygy öwretmek isleýärin.

Men seniň näme isleýändigiňi bilýärin

Öz okyjylarym bilen duşuşmaklyk üçin men soňky üç-dört aýyň içinde Birleşen Ştatlar boýunça kän syýahat etdim. Ähli bolan ýerlerimde aýallaryň arasynda soragnama geçirip, olaryň esasy mätäçliklerini we isleglerini, ýagny olaryň nähili dileg goldawyna has mätäçdiklerini anyklamaga çalyşdym. Şol wagtlar men özümiň «Dileg edýän äriň güýji» atly kitabym üçin gerekli maglumatlary ýygnaýardym. Sorag edilenleriň jogaplary meni haýran galdyrmady, emma aýallaryň öz isleglerinde birdikleri meni gaty haýran galdyrdy. Soragnama gatnaşan aýallaryň iň esasy mätäçlikleri — bu ruhda ösüp, çynlakaý we bütin durmuşyňy özgerdiji halda Hudaýyň yzyna eýermek. Ähli ýerlerde jogaplaryň birmeňzeş bolandyklary sebäpli men soragnamamy bes etdirdim. Surat meniň üçin aýdyňdy!

Seniň hem meniň özüme we ençeme beýleki aýallara meňzeşlikde Hudaý bilen çuňňur, ýakyn, söýgüden doly bolan gatnaşygy isleýändigiňe men ynamlydyryn. Şeýle bolmasa, onda sen bu kitaby okamaklygyňy dowam etdirmezdiň. Seniň janyň ýakynlygy, gürrüňdeşligi, özüňi bolşy ýaly kabul edip, söýmeklerini we özüňiň dogry bahalandyrylmagyňy isleýändir. Emma diňe Hudaýda bu ähli ýagşylyklaryň guramaýan çeşmesi gizlenendir. Ýüregiňiň gizlin islegleri diňe Hudaý bilen ýakyn gatnaşyk arkaly ýerine ýetip bilýändir. Çünki Ondan başga hiç kim hem seniň ýüregiňiň çukluklaryny bilip, seni tanap, şunuň ýaly güýçli söýýän däldir. Seniň duýgularyňdan üstün bolan bu käbir uly zatlara bolan küýseg, doly bolmaklygyny ýakynlaryňda gözleýän sendäki bu içki boşluk — bularyň bary Hudaý tarapyndan saňa berlendir. Hawa, seniň ruhy açlygyňy we ýüregiňiň boşlugyny diňe Özüniň dolduryp bilmekligi üçin olar saňa Hudaý tarapdan berlendir.

Hudaýy küýsemekligimiz Oňa ýakymlydyr. Diňe şu talaby bilmekligimiz bizi azat edýändir. Biziň azatlygymyz öz isleglerimize, ýekeligimize, ruhy boşlugymyza dogry baha berip bilmekligimizde we olarda özümiziň Hudaýa ýakyn bolmaklygymyzyň ýiti mätäçligini duýup bilmekligimizde aýan bolýandyr. Ýöne biziň küýseg edýän Hudaý bilen bu berk baglanyşygymyz öz-özünden peýda bolýan däldir. Ol hakda hökman dileg edip, ony goramaly we ol hakda alada edilmelidir. Şonuň üçin hem biz mydama ol hakda dileg edip, ony emaý bilen goramalydyrys.

Özüňiň günäliligiňi çynlakaý boýun almaklyk

Eger sen adam öldüriji bolmaýan bolsaň ýa-da bank ogurlygyna gatnaşyjylaryň biri bolmadyk hem bolsaň, onda boýun alar ýaly hiç günäň ýokdur diýip oýlama. Eger eýýäm ençeme ýyllap Hudaýyň ýollaryndan ýöreýän bolsaň, her dynç güni irden we üçünji gün agşam ýygnaga gatnaýan bolsaň, ähli dileg ýygnanyşyklarynda bolýan bolsaň, onda seniň boýun alar ýaly hiç hili ýazygyň ýokdur diýip oýlaýmagyn. Günä mydama görünýän ýagdaýynda bolýän däldir. Mysal üçin, Hudaý öz wadalaryny ýerine ýetirermikä diýip, sen haçan bolsa-da bir wagt şübhelendiňmi? Hudaýy şübhe astynda goýmaklyk günädir. Haýsydyr bolsa-da bir adam hakynda gybat etdiňmi? Gybat — bu günä. Özüňiň paýlaşmak islemeýän zadyňy sorar diýen pikir bilen sen gürrüňdeş bolýan adamyňdan gaça durduňmy? Diňe özüňi söýmeklik — bu günä. Haçan bolsa-da bir wagt sen başga adama bolan ýigrenç duýduňmy? Söýgi bilen edilmedik zatlaryň bary günädir.

Günä etmerin diýip ant içmeklik mümkin däl. Şonuň üçin hem günäňi boýun almaklyk gaty wajypdyr. Eger biz öz günälerimizi, ýalňyşlyklarymyzy we ýazyklarymyzy boýun almaýan bolsak, onda biz Hudaýdan daşlaşyp, dileglerimize jogap alyp bilýän däldiris. «…Ýazyklaryňyz siz bilen Hudaýyňyz arasyna aýralyk saldy, günäleriňiz eşitmez ýaly Onuň ýüzüni sizden gizledi» (Işaýa 59:2).

Öz günälerimizi boýun alman, biz Hudaýyň ýüzüne göni seredip bilmän, edil Erem bagyndaky Adam ata bilen How enäniň edişleri ýaly Ondan gizlenmäge başlaýandyrys. Emma Hudaýdan gizlenmek mümkin däldir. Biziň diňe bir gizlin işlerimiziň däl-de, eýsem gizlin pikirlerimiziň we sözlerimiziň hem aýan boljakdygy hakynda Mukaddes Kitapda ýazylandyr. «Üsti açylmajak ýapyk zat, bilinmejek gizlin zat ýokdur. Garaňkylykda näme aýtsaňyz, ýagtylykda eşidiler, içki otaglarda çakan çawuşyňyz tamlaryň üstünden yglan ediler» (Luka 12:2–3). «Hudaýdan gizlin hiç bir mahluk ýokdur, hasap bermeli Hudaýymyzyň gözleriniň öňünde ähli zat ýalaňaç hem açykdyr» (Ýewreýler 4:13).

Neneň gorkuzyjy pikir! Eger her birimiz öz hereketlerimiz barada Hudaýa hasap bermeli bolsak, onda ähli zady Onuň öňünde näçe çalt açdygymyzça, şonça-da gowy bolar. Dogrudan hem, eger özümize aýan bolan günäleri näçe çalt boýun alsak, şonça-da çalt Hudaý bize heniz aýan bolmadyk günälerimizi hem açar. Emma her birimizde ýene näçe günäniň galýandygyny diňe ýeke Hudaý bilýändir.

Günä hemişe-de yz galdyrýandyr. Bu hakynda Dawut şa özüniň günäsini boýun alanynda aýdypdy: «Men dymanymda bütin gün iňňildimden süňklerim garrady. Çünki gije-gündiz Seniň eliň maňa agram saldy; tomus yssysynda ýaly ysgynym gaçdy» (Mezmur 32:3–4).

Çuňňur ýaralaýan sözleri ärimiň maňa aýdan pursatalryndaky başgan geçiren ýigrenjimiň dörän wagtlaryny ýadyma salýaryn. Özümde saklaýan gahar we öýke maňa güýçli agyry ýetirýärdiler. Men özümiň günäli duýgularymy boýun almaklyk islemeýärdim, çünki mende aklama bar, günäkär bolsa meniň ärimdir diýip hasap edýärdim. Emma soňabaka men kimdir birine öýke saklamaklygyň günädigine düşündim we öz ärime bolan ýigrenjimi günä hökmünde boýun aldym. Hut şol pursatda men öz tenimden agyrynyň ýogalandygyny duýdum. «Seniň gaharyň zerarly tenimde sag ýer ýok; günäm zerarly süňklerimde parahatlyk ýok. Ýazyklarym başymdan aşdy, olar agyr ýük kimin götererimden agyr. Akylsyzlygym zerarly ýaralarym porsady, iriňledi» (Mezmur 38:3-5). Teniňdäki agyrylar zerarly ejiriň çekilmezinden hem durmuş gaty agyrdyr.

Günäden başga hiç bir agyr zat ýokdur. Özümizi iki büküp, janlarymyzy öldürip barýandygyny duýýanymyza çenli biz günäniň agyrlygyna düşünip bilmeýändiris. Hudaý bilen özümiziň aramyzda goýlan diwara kellelerimizi urup ýeňjenimize çenli biz onuň dargadyjy güýjüne dorgy baha berip bilýän däldiris. Şonuň üçin hem özümize mälim bolan her bir günäni boýun alyp, öz ýüreklerimizi arassalamak we mümkin boldugyndan çaltlyk bilen Hudaýyň öňünde dogry bolmaklyga çalyşmaklyk iň oňadydyr. Boýun almaklyk günäni aýan edip, ony Hudaýyň öňünde ýamanlaýandyr. Öz günämizi boýun almaklyk bilen biz Hudaýa hiç bir täzelik aýdýan däldiris, çünki Ol biziň kömegimiziň bolmanynda-da ähli zady anyk bilýändir. Ol ýöne seniň özüňiň günäňi boýun almaklygyňy isleýändir.

Emma boýun almaklyk — bu ýönekeý bir toba etmeklik däldir, çünki her kes hem toba edip bilýändir. Köp adamlar bu sungaty gaty oňat özleşdirdiler. Şu meselede olaryň baý tejribeleriniň bardygy sebäpli, bu sungat olar üçin gaty ýeňil başardýandyr. Siz adamlaryň «toba etdim, toba» diýip her ädimde aýdýandyklaryny günde eşidýänsiňiz. Olar özleriniň «toba etdim» ýa-da «bagyşla» ýaly sözlerini ýeňillik bilen sagadyr sola atýarlar. Olar «toba etdim» ýa-da «bagyşla» ýaly sözleri özleriniň günälerine hiç-de göz ýetirip, boýun alman aýdýarlar. Olar özleriniň sözleriniň uly mana eýe bolan hünärmentlerdir. Hakyky boýun alma öz günäňe doly düşünip, onuň dogrudan hem ýamandygyny boýun almaklykdan we soňundan hem ötünç soramaklykdan ybaratdyr.

Dogry saýlaw etmeklik

Biz «ýigrenç» sözüni bilýändiris, onuň täsiriniň güýjüni hem bilýändiris we adatça ony ulanmaklyga synanyşýan däldiris. Başga bir adamy hakykatdan hem ýirgenýändigimiz baradaky pikiriň özi biziň üçin ýakymsyzdyr. Emma gürrüň kine saklamaklygyň ýigrenjiň köki bolýandygynda hem däldir. Eger biz öz öýke-kinelerimiz bilen hoşlaşyp, bagyşlamagy islemeýän bolsak, onda bu duýgular ýigrenje öwrülýändir. Bu sorag babatda Isa gaty berk aýdypdy. Ýahýa bolsa öz hatynda bu barada şeýle diýýär: «Doganyny ýigrenýän kişi ganhordyr, siz hiç bir ganhorda ebedi ýaşaýşyň galmaýanyny bilýänsiňiz» (1 Ýahýa 3:15). Ine-de, bu Isanyň sözleri: «Gökdäki Ataňyz siziň ýazyklaryňyzy bagyşlar ýaly, birinden öýke-kinäňiz bar bolsa, doga etmäge duran mahalyňyz siz-de ony bagyşlaň» (Markus 11:25).

Gel, öz gürrüňlerimize käbir aýdyňlygy girizeliň. Bagyşlamaýan adamlar baky ýaşaýşa umytlary bolmadyk we Hudaýyň bagyşlamasyna eýe bolmadyk ganhorlar diýlip atlandyrylandyrlar. Men şeýle diýerdim: eger bagyşlama bilen kine saklamaklygyň arasynda saýlaw bar bolsa, onda iň oňadyny, ýagny bagyşlamany saýlamaklyk gowudyr.

Kine saklamaklygy saýlamaklyk bilen biz özümizi garaňkylykda gezmeklige sezewar edýändiris (1 Ýahýa 2:9–11 seret). Öz durmuşymyz babatda aýdyň gözýetime eýe bolman, biz büdräp, ýolumyzy ýitirýändiris. Bu bizi hakykatdan çykaryp, ýalňyşlyklary etmegimize getirýändir. Şonda biziň gowşaklyklarymyz artýandyr, keseller inip, ýüregimizi ajy doldurýandyr. Bu töwerekdäkiler üçin aýan bolýandyr, çünki duýgularymyzy gizlemek bize başardýan däldir. Hatda bolup geçýänleriň asyl manysyna düşünmän hem, töwerekdäkiler biziň gizlin kinemizi duýýandyrlar we biziň ýanymyzda olar özlerini oňaýsyz duýýandyrlar. Eger biz bagyşlamagy çözsek, onda munuň netijesinde diňe biziň özümiz däl-de, hatda töweregimizdäkiler hem utuşa eýe bolýandyrlar.

Dogry hereketleri etmeklik

Diňe Hudaýyň Sözüne berk üns berenimizde, biz Onuň erkini bilip bilýändiris. Eger haýsy hereketleriň dogrudygyny bilmeýän bolsak, onda hiç-de şol dogry hereketleri edip bilmeýändiris. Durmuşyň mukaddes kitaby bolan Hudaýyň Sözünden biz özümiziň ähli mätäç bolan zatlarymyz hakynda bilip, özümizden edilýän talaplary öwrenip bilýändiris. Ýöne muňa seretmezden, biz käwagtlar şonda-da özümizi «suwa oklamaly» bolýandyrys. Biziň dogruçyldygymyzyň subutnamasy özümiziň dogry zatlary bilmegimiz däl-de, edýän her bir hereketlerimizdir. Näme edip-etmeli däldigini bilmeklik — bu bir işdir, emma Hudaýyň ýollaryny söýüp, olar boýunça gitmekligi küýsemeklik bolsa — has başga işdir. Dogry durmuş hakynda okamaklyk — bu bir işdir, emma ol boýunça ýaşamaklyk bolsa — has başga işdir. Gulak asmaklyk seniň hereketleriňde beýan edilýändir; gulak asyjy bolmaklyk bolsa seniň dilegiňde beýan edilýändir.

Adamzat nesliniň duşmanyndan azat bolmaklygynyň bäş sany has peýdaly serişdesi

Duşmanyň meýilnamalaryny dargatmaklygymyz üçin Hudaý bizi ýaraglaryň dürli görnüşleri bilen üpjün etdi. Esasy bäşisini agzap geçeliň:

1. Hudaýyň Sözi — duşmana garşy güýçli ýaragdyr. Mukaddes Ruh tarapyndan çöle äkidileninde, Özüni şeýtanyň synajak bolanynda, Isa Hudaýyň Sözüni ulanypdy (Matta 4:1 seret). Özüni şeýtanyň synamagyna ýol bermezligi üçin Hudaýyň Ogluna çöle gitmeklik gerek däldi diýip, köpler pikir edýärler. Emma biziň her birimiziň ýanyma gelşi ýaly, şeýtan Isanyň ýanyna hem hut şeýle geldi we Isa oňa garşy durmaklyk üçin Hudaýyň Sözüni ulandy. Ol şeýtana şeýle diýdi: «… Adam diňe bir çörek bilen däl-de, eýsem, Hudaýyň agzyndan çykan her bir söz bilen hem ýaşaýandyr diýip ýazylgydyr» (Matta 4:4). Eger duşman seniň durmuşyňy kül-peýekun etmäge synanyşýan bolsa, ony Hudaýyň Sözi arkaly derbi-dagyn et. «Paýhasly adam bela-beteri görüp gizlenýändir; mönler bolsa öňe geçip, zyýan görýändir» (Süleýmanyň tymsallary 27:12). Öz durmuşyňda ýamanlygyň bardygyny duýanyň dessine Hudaýyň Sözüne ýüzlen.

2. Hudaýa öwgi — duşmana garşy güýçli ýaragdyr. Biz Hudaýa sežde edenimizde, duşman özüne ýer tapýan däldir. Bu bolsa onuň özüne sežde etmeýän adamlara döz gelip bilmeýänligi bilen düşündirilýändir. Hudaýa alkyş aýdýan adamlar onuň üçin gaty ýigrençdirler. Hudaýa hormat goýmaklyk bilen biz durmuşymyzyň gapylaryny açyp, Hudaýy öz ýüregimize goýberýändiris we netijede Onuň barlygyny duýup başlaýandyrys. Şeýtan bolsa gaça durmaklyga mejbur bolýandyr.

3. Hudaýa gulak asmaklyk — duşmana garşy güýçli ýaragdyr. Eger biz günäde ýaşap, Hudaýa gulak asyjy bolmasak, onda öz durmuşymyza şeýtany çagyrýandyrys. Ol bolsa öz gezeginde, biziň öýümize girip, ol ýerde berk ornaşmaga ukyplydyr. Biziň bilen bolup geçýän ýamanlyklaryň ençemesi duşmanyň hereketleriniň netijeleridir. Ýöne günä etmeklik bilen biziň özümiz şeýtana ýer berýändiris. Şeýtan bolsa ol ýerde oturyp, biziň durmuşymyzda galalar gurýandyr. Biziň üstümizden şeýtanyň hiç hili ygtyýara eýe bolmaýanlygyna seretmezden, özümiziň Hudaýyň parzlaryna boýun bolmazlygymyz öz durmuşymyza şeýtanyň girmegine rugsat berip, onuň aýagastyna halylar düşeýändir. Öz günälerimizi boýun almaklyk we toba etmeklik gapylary onuň burnunyň alnynda kakyp ýapýandyr.

4.Ynam — duşmana garşy güýçli ýaragdyr. Öz ýollaryňda duşmanyň duzaklary goýýandygyny ýadyňda sakla. Ol duzaklaryň adamzat gözleri üçin görünmeýändigi sebäpli, sen olary görýän dälsiň. Onuň duzaklaryna düşmezligiň üçin, sen mümkin boldugyndan Hudaýa has ýakyn baryp, öz ýollaryňy Onuň ugrukdyrmagyna ýol bermelisiň. Munuň üçin bolsa ynam gerekdir. «Hüşgär boluň, oýanyň. Ýagyňyz bolan iblis arlaýjy arslan kimin aýlanyp, ýuwutjagyny agtaryp ýörendir. Dünýädäki doganlaryňyza-da şeýle görgüleriň sataşýanyny bilýäniňiz üçin, oňa garşy imanda berk duruň» (1 Petrus 5:8-9).

5. Dileg we oraza — duşmana garşy güýçli ýaragdyr. Dileg — oraza bilen bilelikde has-da güýçli bolýan ýaragdyr. Duşmanyň tutluşygyndan käwaglar diňe dileg bilen oraza arkaly azat bolup bilinýändir. Oraza we dileg ýaly adaty serişdeleri ulanmaklyk bilen uly üstünliklere ýetip bolýandygy gaty haýran galdyryjy, emma bu dogrudan hem şeýledir. Daşdan seredeniňde, edil hiç zat bolmaýan ýaly, emma ruhy dünýäde bolsa duşmana çynlakaý urgy edilýändir. Duşmanyň seniň durmuşyňy bürän zynjyrlaryny üzmeklik üçin adatça bir günlük oraza ýeterli bolýandyr. Hemişe öz wagtlaýyn oraza tutmaklyk bilen ýamanlygy el astynda saklap, duşmanyň meýilnamalaryny dargadyp bolýandyr. Şunuň bilen birlikde sen edil şeýle diýýäniň ýaly: «Men öz isleglerimden elimi üzüp, öz durmuşymda Hudaýy ilkinji orunda tutýaryn». Duşman üçin bu ýigrençlidir, çünki özüniň üstünden ýeňiş gazanyp bilmekligiň üçin ulanýan orazaňyň güýjüni ol gowy bilýändir.

Öz pikirleriňe ýolbaşçylyk etmeklik

Ýüreklerimizi howpsuzlyk bilen üpjün edip, olary duşmandan goramaklykda biziň öz pikirlerimize ýolbaşçylyk edip bilmekligimiz uly rol oýnaýar. Mukaddes Kitapda şeýle diýilýändir: «Biz ters çekişmeleri, Hudaýyň biliminiň garşysyna aýaga galan her bir belentligi ýykyp, her pikiri Mesihe boýun bolmaga ýesir edýändiris» (2 Korintoslylar 10:5).

Her bir täze ynanan adam üçin bolşy ýaly, kelläme gelen her bir pikiri şübhe astyna salyp bilmeklige hakymyň bardygy, ol pikire gulak asyp-asmazlyga saýlawymyň bardygy hakyndaky täzelik meniň üçin hem täsin ylham boldy. Yzma-yz adam öldürýänler özleriniň bir sesi eşidip, ol sesiň adam öldürmekligi buýrandygyny eşidendiklerini tassyklaýarlar, özleri bolsa şol sese ýöne gulak asyjy bolupdyrlar. Kellelerinde eşidilýän sesleri tanap bilmeýän adamlar ol sesleriň içinden özlerine aralaşyp, olary öz pikirlerine ynandyrmaga synanyşýan şeýtanyň — mekir aldawçynyň sesini tapawutlandyryp bilmeýärler. Biz muňa taýyn bolmalydyrys.

Eý Hudaý, Seniň ähli tabşyryklaryňy

Köne filmlerden oňat ýigit (köplenç ak köýnekli) adatça erbet ýigidi (gara köýnekli) ýeňýändir we oňa sapançany diräp durup: «Eliňi galdyr!» diýip buýurýar («Eliňi galdyr!» sözleri gaty bir gorkuly eşidilýän hem däldir).

Erbet ýigit ýaragyny ýere taşlap, elini galdyrýar we şeýle diýýär: «Boýun bolýan».

Hut şeýle «boýun bolmany» Hudaý bizden garaşýandyr. Emma sen — şol filmdäki erbet ýigit dälsiň, Hudaý bolsa seniň döşüňe sapança direýän hem däldir. Ol Saňa Özüniň barmagy bilen görkezýändir, emma günäkärleýji we garalaýjy halda däl-de, edil seni öz toparyna kabul edeni ýaly söýgi bilen görkezýändir. Hudaý saňa şeýle diýýär: «Sen! Men seni saýlaýaryn! Seniň üçin taýýarlanlarymyň baryny berip bilmegim üçin maňa özüňi tabşyr».

Eger biz jogap berip bilsedik: «Men boýun bolýaryn, eý Hudaý. Mende baryny alaý. Men Seniň ähli tabşyryklaryňy ýerine ýetirerin», onda biziň durmuşlarymyz ähli zatda oňat tarapa üýtgärdi.

Näme üçin şu sözleri aýtmaklyk biziň üçin gaty kyn: «Eý Hudaý, Seniň ähli tabşyryklaryňy… Seniň ähli islegleriňi ýerine ýetirerin»? Munuň sebäbi biziň öz isleglerimiziň ýerine ýetmegini isläp, Hudaýyň özümizden talap edip biljek zatlaryndan gorkmaklygymyzda bolmagy ahmaldyr. Onuň islegi özümize zyýan ýetirip biler diýip biz gorkýarys. Iň kyn zat hem «Isa — Reb» diýmekde däl-de, Onuň aýdyşy boýunça hereket etmekdedir. Isa şeýle diýip sorapdy: «Näme üçin Maňa “Ýa Reb! Ýa Reb!” diýip-de, aýdanlarymy etmeýärsiňiz?» (Luka 6:46). Biz Hudaýyň tabşyryklarynyň özümiz üçin dogrudan hem ýagşylyk getirjekdigine şübhelenýändiris. Bu biderekdir. Özümiziň Onuň ýeňijiler toparynyň agzalarynyň bolmaklygymyzy Hudaý isleýändir.

Eger seniň durmuşyňda ruhy ösüş bolmasa, onda barla: sen Hudaýa doly ynanýarmyň, öz durmuşyňda Isa Reb hökmünde ýer berýäňmi, öz islegleriňden eliňi üzýäňmi? Eger ýok bolsa, onda eliňi galdyr-da, bu ilkinji ädimi ýerine ýetir.

Isa şeýle diýipdi: «Kim öz haçyny göterip, Meniň yzyma düşmese, Meniň şägirdim bolup bilmez» (Luka 14:27). Eger sen öz durmuşyňy Oňa ynanmaýan bolsaň, onda Onuň haçyny göterip bilýän dälsiň. Diňe galyndysyz Oňa tabşyrylan we Oňa boly boýun egdirilen durmuş Onuň Şalygynyň şöhraty üçin peýdaly ulanylyp bilinýändir. Hudaýa seniň bir bölegiň gerek däldir. Ol bütinleý kabul edýändir. Özüňden isleýänleriniň ählisini berip bilmekligiň üçin Hudaýa dileg et.

Biziň janlarymyz üçin gündelik iýmit

Hudaýyň Sözi — biziň janlarymyz üçin çörekdir. Biz onsuz ýaşap bilýän däldiris. Mukaddes Kitapda şeýle diýilýändir: «Adam diňe bir çörek bilen däl-de, eýsem, Hudaýyň agzyndan çykan her bir söz bilen hem ýaşaýandyr diýip ýazylgydyr» (Matta 4:4). Eger biz Hudaýyň Sözünden wagtal-wagtal iýmitlenmesek, onda bizi ruhy açlyk eýeläp başlaýandyr.

Keselhanada bolanymda, Mukaddes Kitabyň ençeme aýatlarynyň ýadymdan çykandygyna haýran galdym. Elbetde, muňa meniň kabul eden agyrylary aýyrýan sansyz-sajaksyz dermanlar hem täsir edipdi, ýöne şonda-da bu ýagdaý meni gaty geň galdyrdy. Şunça ýyllaryň içinde Mukaddes Kitaby öwrenip, azajyk wagtyň içinde şeýle kän zatlary ýatdan çykarmaklyk nädip bolarka? Ýöne şonda-da käbir aýatlar meniň aňyma we ýüregime şeýle bir çuňňur aralaşypdylar welin, hatda men olary düýşümde-de ýatlap bilerdim. Şonda men Hudaýyň sözüni ýüreklerimizde möhürläp saklamaklygyň her birimiz üçin neneň wajypdygyna düşündim. «Şonuň üçin eşidenlerimizden daşlaşmaz ýaly, olara has köp üns bermelidiris» (Ýewreýler 2:1).

Iň ýokary ileri tutma

Eger durmuşymyzda ileri tutmalar nädogry ýerleşdirilen bolsa, onda ol üstünlikli bolup bilýän däldir. Ileri tutmalary ýerleşdirmeklik bilen bolsa biz günde meşgullanýandyrys. Ýöne biz öz durmuşymyzy tertibe özbaşdak getirmeklige ukyply däldiris. Munuň üçin bize Mukaddes Ruhuň ýolbaşçylygy we Hudaýyň Sözüni oňat bilmeklik wajypdyr. Biziň durmuşymyzyň iň esasy iki ileri tutmasy hakynda Isanyň Özi tarapyndan ýazgyda aýdylandyr: «Hudaýyň Rebbi bütin ýüregiň, bütin janyň, bütin düşünjäň bilen söý». Bu birinji we iň beýik parzdyr. Ikinjisi bolsa şeýle diýýär: «Goňşyňy özüň ýaly söý» (Matta 22:37, 39 seret). Mundan anyk aýtmaklyk mümkin däl. Eger sen bu iki parzy — Hudaýy we goňşyňy söýmekligi durmuşyňyň iň beýik ileri tutmasy diýip hasaplaýan bolsaň, onda öz durmuşyňda beýleki galan ileri tutmalary dogry ýerleşdirip bilersiň.

Durmuşyňda iň esasy zat — bu seniň Hudaý bilen gatnaşygyň bolmalydyr. Hudaý şeýle diýýär: «Seniň Menden başga hudaýlaryň bolmasyn» (Çykyş 20:3). Bu dogrudan hem şeýledir. Hudaýa seniň üznüksiz bolan ünsüň gaty wajypdyr. Eger sen günde Onuň ýüzüni agtaryp, durmuşyňy tertibe getirmäge kömek etmegini dileýän bolsaň, onda Ol saňa jogap berer. Eger ilki bilen Hudaýy gözlemesek, onda durmuşymyzyň gözegçilik astyndan çykýandygyny men öz tejribämden bilýändirin. Netijede bolsa ýagdaýlaryň üstünden özümiziň ýolbaşçylyk etmekligimiziň deregine, ýagdaýlar biziň üstümizden ýolbaşçylyk edip başlaýandyrlar.

Hudaý — tertibiň Hudaýydyr. Älimiň gurluşy munuň subutnamasy hökmünde hyzmat edip biler, çünki älimde hiç bir tertipsiz we tötänlikden dörän zat ýokdur. Biziň durmuşymyz hem edil şeýle gurlan bolmalydyr, çünki bu Hudaýa ýakymlydyr: «…herki zat sypaýyçylyk hem tertip bilen bolsun» (1 Korintoslylar 14:40). Eger biz bu hakda dileg edýän bolsak, Ol bize kömek eder. Nädip güýçli we berk ganatlaryň aşagynda gizlenmelidigimizi Ol görkezer, başgaça aýdanyňda, Ol nädip biziň Özüniň goragy astynda bolup biljekdigimizi aýan eder. Bu biziň Hudaýyň patalaryna bolan ýoldaky hereketlerimiz üçin gaty wajypdyr.

Hudaýa sežde etmekligiň ýigrimi sany degerli sebäbi

1. Ol meniň ähli günälerimi bagyşlaýar.

2. Ol meniň ähli kesellerime şypa berýär.

3. Ol meniň durmuşymy heläkçilikden halas edýär.

4. Ol maňa merhemet we rehim täjini geýdirýär.

5. Ol meniň isleglerimi ýagşylyk bilen doldurýar.

6. Ol ezilenlere dogrulyk we adalatlyk döredýändir.

7. Ol Öz ýollaryny görkezýär.

8. Ol mähirli.

9. Ol rehimdar.

10. Ol gahary gelmezek.

11. Ol merhemete boldur.

12. Ol hemişe käýemez.

13. Ol bize günälerimize laýyk iş etmedi.

14. Onuň merhemeti Özünden gorkýanlaryň depesinde uludyr.

15. Ol jenaýatlarymyzy bizden uzaklaşdyrýandyr.

16. Ol bizi bagyşlaýandyr.

17. Biziň toprakdandygymyz Onuň ýadyndadyr.

18. Onuň merhemeti ezelden ebedä çenlidir.

19. Ol Özüniň parzlaryny unutmaýan biziň çagalarymyza we agtyklarymyza pata berýändir.

20. Ol tagtyny göklerde gurdy we patyşalygy hemmäniň üstünden höküm sürýär.

Her kim üçin hem iş bardyr

Seniň kimdigiňe, ýagny uly guramanyň işgäri, özüni üpjün edýän ýeke ýaşaýan aýal, öý hojaýyny, işjeň aýal, maýyp, hassa seredýän, ýeke ýaşaýan ene, kömek edýän guramanyň işgäri bolýandygyňyň parhy ýokdur — kim bolýandygyňa seretmezden, sen öz işiňi ýerine ýetirýärsiň. Ady belli adam ýa-da «kiçi» adam bolýandygyňyň hem uly manysy ýokdur. Işläp, näçe gazanç edýändigiňiň hem parhy ýokdur, çünki seniň edýän işiň Hudaý üçin wajypdyr. Öz hyzmatyňa Onuň pata bermekligine sen umyt edýärsiň.

Näme edýändigimize seretmezden, biz öz işimizi oňat etmekligi isleýändiris. Eger işimiz oňuna bolsa, bu bizi şatlykdan doldurýandyr. Bir oňat işi etmeklik bilen, töwerekdäkiler, maşgalanyň agzalary, biziň özümiz üçin peýdaly işi etmeklik bilen, biz kanagatlanma eýe bolýandyrys. Eger biziň işimiz Hudaý tarapyndan patalanan bolmasa, onda biz lapykeçligi we nägileligi duýýandyrys.

Mukaddes Kitap kämil aýaly işjeň hökmünde suratlandyrýar (Süleýmanyň tymsallary 31 seret). Ol gozgalmaýan mülk bilen satyk-söwda edýär (gozgalmaýan mülk boýunça agent?); ol üzümçilige seredýär (bagban?); ol geýim tikip (tikinçi), ony satýandyr (dükanyň müdiri?). Ol güýçli, hereketjeň we akylly aýaldyr; ol giç agşama çenli işleýär we özüniň adamlar üçin ýaradanlarynyň oňat hillidigini bilýändir. Hudaý biziň üstünliklere şatlanyp, mydama minnetdarlykly bolmagymyzy isleýändir. Emma bularyň bary dilegsiz amala aşýan däldir.

Dileg bizden ýaşaýşymyzy alýan «başganyň ýagşylygyna göz gyzdyrmaklyk» (Süleýmanyň tymsallary 1:19 seret) bilen bizi garyp edýän «ýalta eliň» arasynda deňagramlylygy gurnamaga kömek edýändir (Süleýmanyň tymsallary 10:4). Dileg bizi «baýlyk ýygnamaklyk» (Süleýmanyň tymsallary 23:4–5 seret) isleginden gorap, bize sap ynsap bilen zähmet çekmeklik islegini berýändir, netijede bolsa maddy sylag getirýändir (Süleýmanyň tymsallary 10:4 seret). Dileg bize ýaltalyk bilen çendenaşa zähmetsöýerligiň arasynda deňagramlylygy tapmaga kömek edip, bütin dünýä eýe bolup, janyňy bolsa ýitirmeklikden goraýandyr (Matta 16:26 seret).

Mukaddes Kitapda: «Işçi öz hakyna mynasypdyr» diýlendir (1 Timoteos 5:18). Diýmek, sen öz zähmetiň üçin sylaga eýesiň. Käwagtlar bolsa zähmetiň özi sylag bolup bilýändir. Mysal üçin, sen öý işlerini ýerine ýetirýändigiň üçin, mugt nahar berýändigiň üçin ýa-da çaga köwşüni geýmekligi öwredýändigiň üçin pul alýan dälsiň. Emma öz zähmetiňiň netijelerini görmeklik gymmatbaha sylag bolýandyr. «Dogrynyň zähmeti ýaşaýşa ýetýändir» (Süleýmanyň tymsallary 10:16).

Eger sende oňat tölenýän işiň bar bolsa, onda mundan beýläk hem işiňiň şunuň ýaly oňat tölenmegi üçin dileg et. Özüniň işgärleriniň zähmetleri üçin oňat aýlyk töläp bileri ýaly, öz başlygyň üçin pata dile. Dilegleriňde işiňde beýik derejelere eýe bolmaklygyň üçin sora, emma bu diňe Hudaýyň erki boýunça bolmalydyr. Şeýle diý: «Eý Hudaý, men öz hünärim boýunça ýokary derejä eýe bolup, oňat aýlyk almak isleýärin. Eger, elbetde, muňa Seniň erkiň bar bolsa, onda ol dileýşim ýaly hem bolsun». Eger sen şeýle dileg edip, işiňi Hudaýa bagyşlaýan bolsaň, onda Ol hökman pata berer.

Seniň maddy ýagdaýyňyň oňatmy ýa-da oňat däl bolýanlygynyň parhy ýokdur — seniň zähmetiň Hudaý üçin, adamlar üçin we seniň özüň üçin wajypdyr. Sen bu dilegi ret etmeli dälsiň. Öz zähmetiňi Hudaýa bagyşlap, Onuň patasyny dile.

Baý miwe ýetişdirmekligiň dokuz sany dogry usuly

1. Söýgi tohumlaryny ekmeklik. Söýginiň dolulygyny duýup bilmekligiň üçin söýgi tohumlaryny ýüregiňde ýygy-ýygydan ekmekligi hakynda Hudaýdan haýyş et. Onuň söýgüsiniň özüň arkaly beýlekilere hem täsir etmegini Hudaýdan dile. Isa şeýle diýipdi: «Meniň Atamyň buýruklaryny berjaý edip, Onuň söýgüsinde galyşym ýaly, siz hem buýruklarymy berjaý etseňiz, Meniň söýgimde galarsyňyz» (Ýahýa 15:10). Onuň söýgüsiniň ýakymly ysynyň hiç haçan hem ýüregiňde tükenmezi ýaly, özüňiň Oňa gulak asyjy bolmaklygyň hakynda Hudaýa dileg et.

2. Şatlygyň tohumlaryny ekmeklik. Hudaýdan gelen şatlyk seniň durmuş ýagdaýlaryňa hiç hili hem bagly däldir. Şatlygyň hut Hudaý bilen gürrüňdeşlikde döreýändigi sebäpli, durmuşyňda peýda bolýan çylşyrymly we agyryly kynçylyklara seretmezden, sen ol şatlygy duýup bilýänsiň. Özüni Hudaýdan daşlaşdyrana ýa-da Onuň wadalaryna ynanmaýana şatlyk berilýän däldir. «Size bu zatlary Meniň şatlygym sizde bolsun we şatlygyňyz doly bolsun diýip aýtdym» (Ýahýa 15:11). Eger seniň durmuşyňda Hudaýdan gelen şatlyk bar bolsa, onda durmuşyňda Hudaýyň bir beýik zady ýerine ýetirjekdigine bolan umyt sende bardyr. Ýüregiňde Hudaýdan gelýän şatlygyň tohumlarynyň ekilmegi we ol şatlygy töwerekdäki adamlara hem berip bilmekligiň hakynda dileg et.

3. Parahatlygyň tohumlaryny ekmeklik. Öz durmuşyňda Hudaýyň bolmaklygynyň ýüregiňde parahatlygy döretmegi we ähli düşünjelerden beýik bolan ol parahatlygyň hiç zada seretmezden, ýüregiňde höküm sürmekligi hakynda dileg et. «Her hili düşünjeden ýokary bolan Hudaýyň parahatçylygy Mesih Isada siziň ýüregiňizi, pikirleriňizi gorar» (Filipililer 4:7). Diňe Hudaý bilen berk gatnaşyklar gurnalanynda, Onuň parahatlygy biziň ýüregimizde bolýandyr. Hudaýy çuňňur tanamaklygyň we töweregiňdäkiler üçin özüňiň parahatlygyň çeşmesi bolmaklygyň üçin dileg et.

4. Sabyrlylygyň tohumlaryny ekmeklik. Seniň pikiriňçe, näme üçin biziň sabyrlylygyň miwelerini getirmekligimizi Hudaý isleýändir? Hudaýda ähli zadyň öz wagty bolýanlygy üçin bolmagy mümkindir. Ol mydama bize açýanlaryndan hem kän zatlary edýändir we şonuň üçin hem Ol bir zadyň ýerine ýetmekliginiň wagtyny belläninde, Oňa ynanmaga esas bardyr. Biz baradaky niýetlerini amala aşyrmazyndan ozal Hudaý bizi kämil edip, arassalaýandyr. Bu bolsa kesgitli wagty talap edýändir. «…siz ýalta bolman, gaýtam, wada edilenleri iman hem sabyr arkaly miras alanlardan görelde alar ýaly…» (Ýewreýler 6:12). «Kämil hem doly bolup, hiç bir ýetmeziňiz bolmaz ýaly, çydam işiňi kämil etmelidir» (Ýakup 1:4). «…çydamak bilen janyňyzy halas edersiňiz» (Luka 21:19). Diňe synaglarda sabyrly bolup bilinýändir. «Seniň sabryň bar. Meniň adym ugrunda dert çekdiň, ýadamadyň» (Ylham 2:3). Şunuň bilen bary aýdylandyr. Sabyrlylykda berk bolmaklygyň we bu sabyrlylygy senden hiç bir synagyň hem köki bilen goparyp bilmezligi üçin dileg et.

5. Ýagşylygyň tohumlaryny ekmeklik. Öz bagyňda ekmeklik üçin tohumlaryň haýsy hillerini almaklyk saýlawy sende bardyr. Sen gerekli tohumlary saýlap alyp, olary topraga taşlaýarsyň, Hudaý bolsa olary ösdürýändir. Ýagşylygyň tohumlary — ine, bu seniň ekmelileriňiň ilkinjisidir. Başgaça aýdylanda, sen geýimlere geýnilişi ýaly, ýagşylyga geýinmekligi saýlaýansyň (Koloseliler 3:12). Ýagşylygyň iň beýik aýan edilmegi — Isanyň Öz durmuşyny biziň üçin pida edip, haçda Özüni gurban getirmekliginde bolup geçdi. Ýagşylygyň tohumynyň öz ýüregiňde ösmekligi we seni ýagşy işlere taýýar etmekligi hakynda Hudaýa dileg et.

6. Bähbitliligiň tohumalaryny ekmeklik. Isanyň bähbitliligi seniň ýüregiňde oturdylanynda, sende oňat işleri etmeklik islegi döreýändir. «Oňat adam oňat hazynasyndan oňat zat çykarar, erbet adam erbet hazynasyndan erbet zat çykarar» (Matta 12:35). «Şonuň ýaly-da her bir oňat agaç oňat miwe berýändir, erbet agaç bolsa erbet miwe berýändir. Oňat agaç erbet miwe berip bilmez, erbet agaç-da oňat miwe berip bilmez» (Matta 7:17–18). Onuň bähbitliginiň sende galmaklygy üçin Onuň özüňde galmaklygy hakynda dileg et. Ol bähbitliligiň seniň ýüregiňde kök urşuna baglylykda, sen töweregiňdäkilere ýygy-ýygydan ýagşylyk edip başlarsyň.

7. Ynamlylygyň tohumlaryny ekmeklik. Eger biz ynamda berk we yrgyldamaz durýan bolsak, eger biz umytly, wepaly we ynama mynasyp bolýan bolsak, onda biz özümiziň Hudaýa bolan wepalylygymyzy görkezýändiris. «Az zatda ynamly bolan köp zatda hem ynamlydyr, az zatda hilegär bolan köp zatda hem hilegärdir» (Luka 16:10). Hemişe Hudaýa ynamly bolmaklygyň üçin dileg et. Hudaýa wepalylygyňy saklamaklyk bilen, öz ýanyňdakylara oňat mysal berip bilmekligiň üçin dileg et.

8. Hoşniýetliligiň tohumlaryny ekmeklik. Eger biz özümizi gopbamsy we gödek alyp barýan bolsak, onda bu adamlary gaharlandyryp, olary bizden daş edýändir. Hoşniýetli bolmaklyk — bu özüňi töweregiňdäkiler bilen ýuwaş, mähirli we mylaýym alyp baryp, olar bilen oňat gürleşmegi aňladýandyr. Mukaddes Kitapda şeýle diýlendir: «Rebbiň guly dawalaşmaly däl, hemmelere mylakatly, öwretmäge ukyply, sabyrly bolmalydyr» (2 Timoteos 2:24). «…Gökden inen akyldarlyk ilki bilen, sap, ondan soň-da parahatlyk söýüji, mylaýym, diýenediji, rehimden, oňat miwelerden doly, ýüz görmezek we ikiýüzlülikden halasdyr» (Ýakup 3:17). Adamlara hoşniýetli gatnaşyklaryňda beýan edilýän olaryň duýgularyna we talaplaryna ünsli bolmaklygyň seniň Hudaýyň Ruhuna gulak asyjydygyňa şaýatlyk edýändir. Onuň sende eken tohumlary bolsa, gögerip başlandyr. Häsiýetiňde Isanyň ýumşaklygynyň we hoşniýetliliginiň peýda bolmaklygy hakynda dileg et (2 Korintoslylar 10:1 seret).

9. Özüňe erk etmekligiň tohumlaryny ekmeklik. Özüňe erk etmeklik bir ir-iýmişiň kiçijik düýbüni däl-de, almanyň ullakan agajyny ýadyňa salýandyr. Şeýle ullakan we mynasyp miwe getirip biljek ösümligi seniň ýüregiňde diňe Hudaý oturdyp bilýändir. Özüne erk edip bilmeýän adam hereketleriniň netijelerine seretmän, özüne ýaran zatlary edýändir. Başyňa düşýän synaglara döz gelip beleriň ýaly Hudaýdan güýç sora. «Şonuň üçin bütin gaýraty sarp edip, imanyňyzda artyklygy, artyklykda bilimi, bilimde nebsiňize buýurmagy, nebsiňize buýurmakda sabry, sabyrda takwalygy, takwalykda dogan söýgüsini, dogan söýgüsinde hem Hudaýyň söýgüsini köpeldiň» (2 Petrus 1:5–6). Berk agajyň ösmekligi üçin ýüregiňde özüňe erk etmekligiň tohumlaryny ekmekligi Hudaýdan sora. Islegleriňe we duýgularyňa gözegçilik edip, olary Öz Ruhuna tabyn etdirmekligini Hudaýdan dile. Hudaý saňa hökman özüňe erk edip bilmekligi öwreder.

Eger Mukaddes Ruhuň isleýän miwelerini getirmeklik saňa hiç-de başartmaýan bolsa, onda öz ýüregiňde oňat tohumlary ekip, onda ösen haşal otlary aýyrmaklygy hakynda Hudaýdan sora. Ýüregiňiň topragyny Hudaýyň Sözi bilen iýmitlendir we Hudaýyň suwy bilen günde suwarmaklygy hakynda Mukaddes Ruhdan haýyş et. Eger sen Hudaýa ynamly bolup, hakyky üzüm agajynda bolýan bolsaň, onda seniň ýüregiňde ruhy miwe ýetişer we ol miweden Gökdäki Atamyz razy bolar.

Günäsizlikde gezmekligiň ýedi sany häsiýetli alamatlary

1. Günäsizlikde gezmeklik özüňi dünýäden aýyrmaklygy göz öňünde tutýandyr. Bu diýmeklik ynanmaýanlardan gaçyp, mysal üçin, daga gitmekligi aňladýan däldir. Bu diýmeklik sen bu dünýäniň eý görýän zatlaryny terk edip, onuň deregine Hudaýyň eý görýän zatlaryny kabul etmekligiňi aňladýandyr. Tersine bolaýsa, onda netijeleri gaty elhenç bolup biler: «…dünýä dostlugynyň Hudaýa duşmançylykdygyny bilmeýärsiňizmi? Dünýäniň dosty bolmak isleýän adam özüni Hudaýa duşman edýändir» (Ýakup 4:4). Kim Hudaýa duşman bolmak isleýär?

Ýaşaýan dünýäňden özüňi aýyrmaklygyň neneň kyndygyny men bilýärin. Emma sende şeýle isleg bar bolsa, onda Hudaýyň kömek etmegini sora. Elbetde, sende saýlaw bardyr: telewideniýe boýunça käbir programmalara seredip-seretmezlik, käbir aýratyn filmlere gidip-gitmezlik, käbir žurnallary okap-okamazlyk, käbir ýerlere baryp-barmazlyk. «Dünýäni, dünýädäki zatlary söýmäň. Biri dünýäni söýýän bolsa, onda Atanyň söýgüsi ýokdur. Çünki dünýäde bolan ähli zatlary: ten höwesleri, göz höwesi we ýaşaýyş tekepbirligi Atadan däl, dünýädendir» (1 Ýahýa 2:15–16). Dünýäniň işlerinden daş durup bilmekligiň we Ony dünýäden hem güýçli söýmekligiň üçin Hudaýdan kömek sora.

2. Günäsizlikde ýaşamaklyk ýüregiňi arassalamagy göz öňünde tutýandyr. Ýüregiňi arassalamak — ähli ýamanlyklaryňy ýapýan ak geýimlere geýinmekligi aňladýan däldir. Iş ýüzünde bu mukaddes bolan Hudaýyň öz ýüregiňi arassalamagyny haýyş etmekligi aňladýandyr. Ezelden bäri ýürekde günä ýaşaýandyr. Arassalanmagyň manysy bolsa öz durmuşyňy, pikirleriňi, hereketleriňi, gatnaşyklaryňy derňäp, özüňi her bir ýamanlykdan arassalamaga girişmekligi aňladýandyr. Biz ahlak we etiki taýdan arassa bolmaklyk çözgüdini kabul edip, hereket etmäge başlamalydyrys. «Oňa umyt baglan her kes Onuň sap bolşy ýaly, özüni saplar» (1 Ýahýa 3:3). «Mukaddes boluň» (Lewiler 19:2 seret) diýmeklik bilen, Hudaý bize şu parzlary berdi: ogurlama, aldama, hilegärlik etme, biderek ýere garalama, ar alma, özüňe butlar ýasama. Bu ýerden biziň ahlaksyzlykdan arassalanandygymyzy subut edýän anyk hereketleri etmelidigimiz gelip çykýar. Biz günäli we mynasyp bolmadyk ýaşaýşy ykrar edýän her bir zatlardan daş durmulydyrys. «…eýsem, sizi çagyranyň mukaddes bolşy ýaly, ähli edim-gylymyňyzda mukaddes boluň. Sebäbi: “Mukaddes boluň, çünki Men mukaddesdirin” diýip ýazylgydyr» (1 Petrus 1:15–16). Öz ýollaryňy üns bilen barlap, Hudaýa ýüzlenmekligi öwrenmekligiň üçin dileg et.

3. Günäsizlikde ýaşamaklyk ten boýunça däl-de, ruh boýunça ýaşamaklygy göz öňünde tutýandyr. Durmuşymyzda biziň ten isleglerimiz uly rol oýnaýandyrlar. Biz kimdir birine göz gyzdyrýarysmy? Kimdir biri bilen uruşýarysmy? Öz durmuşymyza günäni bilgeşleýin goýberýärismi? Eger şeýle bolsa, onda biz ten boýunça ýaşaýandyrys. Bu hem bizi öldürýändir. «Çünki tene görä bolanlar tene degişli işlere, Ruha görä bolanlar hem Ruha degişli işlere pikir edýändir. Çünki tene daýanýan pikir ölüm, Ruha daýanýan pikir ýaşaýyşdyr, parahatlykdyr. Sebäbi tene daýanýan pikir Hudaýa duşmançylykdyr, Hudaýyň kanunyna tabyn bolýan däldir, muny başarýan hem däldir. Şonuň üçin teniň hökümi astyndakylar Hudaýyň göwnünden turmagy başarmaz» (Rimliler 8:5–8). Eger sen öz durmuşyňy dogry bahalandyryp bilýän bolsaň, onda orýan miweleriň arkaly tohumy tenemi ýa-da ruha ekendigiňi bilip bilersiň. «Aldanmaň, Hudaý Özüni ýaňsyladýan däldir! Adam näme ekse, şony orar. Çünki öz günäli teninde ekin eken tenden çüýreme orar, Ruhda eken bolsa Ruhdan ebedi ýaşaýyş orar» (Galatýalylar 6:7–8).

4. Günäsizlikde ýaşamaklyk zyna günäsinden saklanmaklygy göz öňünde tutýandyr. Biziň jemgyýetimiziň iň uly azaşmaklygy — onuň zyna günäsine bolan ýeňil kellelik bilen gatnaşyk etmegindedir. Aýallaryň şeýtanyň ýalanyna ynanyp, öz tenlerini satýandyklarynyň Mukaddes Ruhy neneň gamgyn edýändigini göz öňüne getirip bolýandyr. Netijede bolsa şeýle aýallar özlerini Hudaýyň patalaryndan hem mahrum edýändirler. Ýene bir mysal: häzirki nesil özleri üçin özlerini aldamaklygy saýlap, ýanýoldaşyňdan başga biri bilen çaga döremeýän ýagdaýdaky jynsy gatnaşygy günä hasaplamaýar. Netijede bolsa, şeýdip hereketleriňiň netijelerinden gorkman, öz teniňi höweslendirip bolýandyr. «Bir nesil bardyr, öz gözüne päk görünýändir, aslyýetinde bolsa murdarlygyndan ýuwlan däldir» (Süleýmanyň tymsallary 30:12). Islenilmedik göwrelilikden özlerini goramaklyk bilen, adamlar öz janlaryny ýoguna köýýändirler, soňundan bolsa nika gurup, näme üçin är-aýal gatnaşyklaryndan şatlyklarynyň ýoklugyna haýran galýarlar. Günäsizlikde gezmeklik — bu haýsydyr bir täze pikire ýa-da urga eýermeklik däldir (1 Selanikliler 4:3–5 seret). Öz aklyňy, janyňy we teniňi arassa saklamagy hakynda Hudaýa dileg et.

5. Günäsizlikde gezmeklik Isanyň ady bilen mukaddes bolmaklygy göz öňünde tutýandyr. Isany öz durmuşymyza çagyrmaklyk bilen, biz indi özümiziň öňki günäli durmuşymyz bilen ýaşap bilmeýändiris. Indi, haçanda Ol bizde ýaşap, Mukaddes Ruh bolsa bizi dolduryp, özgerdeninde, biz özümiziň mynasyp bolmadyk hereketlerimizi aklap bilýän däldiris. «Biz bu isleg boýunça Isa Mesihiň bedeniniň bir gezek hödürlenmegi bilen mukaddes edildik» (Ýewreýler 10:10). «Çünki mukaddes edilenleri diňe bir gurban bilen hemişelik kämillige ýetirdi» (Ýewreýler 10:14). Isanyň ähli zat babatda alada edýändigi sebäpli, bu biziň günäden goragly bolup, islänimizi edip bilýäris diýmekligi aňladýan däldir. Bu beýle däl. Bu biziň Isada galmaklygymyzy dowam etdirmegimizi we günäsizlikde gezmeklik üçin Hudaýyň kömegini dilemegimizi aňladýandyr.

6. Günäsizlikde gezmeklik Hudaýa ýakynlaşmagy göz öňünde tutýandyr. Eger biz päklikde we parahatçylykda ýaşap, Hudaýyň ýollaryndan ýöräp, Oňa ýakynlaşmaklyk hakynda alada etmeýän bolsak, onda biz hiç haçan hem Hudaýy görüp bilmeris. «Hemmeler bilen parahatçylykda ýaşamak, mukaddes bolmak üçin tagalla ediň. Mukaddes bolman, hiç kim Rebbi görüp bilmez» (Ýewreýler 10:14). Hudaýyň mukaddesligi we päk durmuş hakynda oýlanmaklyk — ine, bu Hudaýa ýakyn bolmaklygyň ýeke-täk usuly (Mezmur 24:3–4 seret). Hudaýa ýakynlaşmakdan başga hiç bir wajyp zat ýokdur. Her birimiziň durmuşymyzda Hudaýyň öz ýanymyzdadygyny, Onuň ähli dileglerimizi eşidýänligini duýup başlaýan pursatlarymyz bolýandyr. Bizde Hudaý bilen ylalaşmaga wagt bolmaz, emma biz Onuň öňünde jogap bermeli bolarys. «Emma şuny bilip goýuň, Reb hudaýhon adamy Özi üçin aýryp goýandyr. Ony çagyramda Reb meni eşider» (Mezmur 4:4). Şu wagt dogry ýaşamaklygyň, öz durmuşyňy arassalap, mukaddes etmekligiň wagtydyr, çünki biz öz dileglerimize geljekde jogap almaklyk isleýändiris.

7. Günäsizlikde gezmeklik Hudaýa doly ynanmaklygy göz öňünde tutýandyr. Mukaddeslik — bu üstüňe atyp ýa-da çykaryp bolýan geýim däldir. Biz mukaddeslikde ýaşamalydyrys — asyrlaryň jümmüşinden bäri Hudaýyň erki şeýledir. «Ol Öz öňünde söýgüde mukaddes, müýnsüz bolmagymyz üçin, dünýä gurulmazdan öň bizi Mesihde saýlady. Söýgüli Oglunda bize beren şöhratly merhemetiniň öwgüsi üçin, bizi Öz ýagşy niýetli islegine görä, Mesih arkaly öňünden Özi üçin ogullyga belledi» (Efesliler 1:4–6). Hudaý bize mukaddes durmuşa bakan ýoly görkezdi we Ol bizi päklikde saklar. Eger biziň ýüreklerimiz dogry ýaşaýşy küýseýän bolsa, Hudaý bizi günä etmeklikden saklar.

Ybraýym Saranyň öz aýaly däl-de, aýal dogany diýip Abymelek patyşa aýdanynda, patyşa Sarany öýüne getirdipdi. Emma Hudaý başganyň aýalyny alandygy üçin tizara öljekdigini Abymelege düýşünde açdy. Abymelek şeýle diýdi: «Men bu işi päk ýürek we ynsap bilen etdim» (Gelip çykyş 20:5).

Hudaý Abymelege: «Seniň muny päk ýürekden edendigiňi Men bilýärin. Seni Özüme garşy günä etmeklikden saklan Mendirin. Şonuň üçin seniň oňa el urmagyňa ygtyýar bermedim» diýdi (Gelip çykyş 20:6).

Eger biz dogry ýaşaýan bolsak, onda Hudaý bizi günäden saklar.

Hatda biz günäsizlikde gezmekligi saýlaýan hem bolsak, muny biz Hudaýyň kömegi bolmasa, ýerine ýetirip bilýän däldiris. Çünki Hudaýyň bizi çagyrýan işini edip bilmekligimiz üçin diňe Onuň Özi bize güýç berip bilýändir. Ýöne biz mydama Hudaýdan bu barada haýyş etmelidiris, çünki Hudaý biziň Onuň mukaddesligini küýsäp, ony gözleýändigimizi bilmek isleýändir. Adamlaryň günäsizlikde gezmekligi ýygy-ýygydan terk edýändiklerine seretmezden, olar üçin beýle ýaşaýyş özüneçekijidir. Seni Öz mukaddesliginiň gözelligine birikdirip, durmuşyňy arassalamagy hakynda Hudaýdan kömek sora.

Her kimde hem maksat bardyr

Her bir aýalyň öz maksatnamasy bardyr, emma olaryň her biri muňa düşünýän däldir. Eger bizde öz maksatnamamyz babatda aýdyň öňden görüjilik bolmasa, onda biz hökman birinden görelde almaga ýa-da özümizi iş ýüzündäkisinden artyk alyp barmaga başlaýandyrys. Şeýle-de, biz özümizi beýlekiler bilen deňeşdirip, özümizi betbagt hasaplaýandyrys.

Eger biz özümiz baradaky göz öňüne tutmalarymyza laýyk gelýän bolmasak, onda öz-özümizden nägile bolup, özümizi ejiz we biçäre duýup başlaýandyrys. Netijede biz özümizi ýigrenýäris, durmuşymyz bize boş ýaly görnüp başlaýandyr, özümizi derňemäge başlaýandyrys we diňe özümiziň nähili bolmalydygymyz hakynda oýa batýandyrys. Bularyň bary bizi öz durmuşymyzy göz öňüne getirýänimize laýyklykda düzetmäge girişmäge mejbur etdirýändir. Hiç bolmanda, biz öz-özümize ýalan sözläp başlaýandyrys we netijede özümiz barada nädogry düşünje döredýändiris. Durmuşlarynyň ugurlaryny we maksatlaryny ýitiren adamlary tanamaklyk gaty aňsatdyr. Çünki beýle adamlar öz töwereginde howsalalyk, kanagatlanmasyzlyk we alada ýaly duýgulary döredýändirler.

Hudaý seniň üçin beýle ykbaly isleýän däldir. Ol seniň öz durmuşyňyň maksadyna anyk düşünmegiňi isleýändir; Ol Özüniň saňa beren sylaglaryny aýan edip, olary Öz Sözüne laýyklykda ösdürmekligi isleýändir.

Ruhy maşgala eýe bolmaklyk gaty wajypdyr

Hudaý — biziň Atamyz. Biz — Onuň perzentleri. Munuň yzysüre, Isa Mesihe ynanýanlaryň bary — doganlar. Bir öýe sygdyrar ýaly, biz gaty köplükdiris, şonuň üçin hem Hudaý bizi dürli öýlerde ýerleşdirýändir we ol öýleri biz ýygnak diýip atlandyrýarys. Ýygnak maşgalasyndaky biziň bir-birimize bolan gatnaşyklarymyzdan köp baglydyr. Ýygnakdaky adamlar bilen gurýan gatnaşyklarymyz biziň ruhy ösüşimize täsir edýändir. Biz Hudaýyň öz durmuşymyza girizen adamlaryndan daş durmaklyk bilen, hiç haçan hem öz maksadymyza ýetip bilmeýändiris. Bu diýmeklik, ol adamlar biziň öz maksatlarymyza ýetmegimize kömek edýärler diýmekligi aňladýan däldir. Emma olar bilen gürrüňdeşlik biziň üstünligimize uly täsir edýändir.

Öz durmuş ýollarynda Hudaý bilen gidýän adamlar bilen oňat gatnaşygy saklamaklyk biziň üçin gaty wajypdyr. Çyn ýürekden ynanýan adamlar bilen gatnaşygymyzyň netijesinde, bizde olaryň öňünde jogapkärçiligimiz peýda bolýandyr, olarda bolsa, öz gezeginde, özleriniň gatnaşyk edýän has hem ruhy taýdan güýçlüräk bolan ýolbaşçylarynyň öňünde jogapkärçilik duýgulary peýda bolýandyr. Ählimiziň hem aldanýandygymyz sebäpli, has ýetişen mesihä tabyn bolmaklygymyz biziň her birimiz üçin hem gaty wajypdyr. Biziň her birimiziň hem gowşaklyklarymyz bardyr, şonuň üçin hem özümizi we özümiziň durmuşymyzy hakykat arkaly görüp bilýän adamlara biz mätäçdiris. Adalatly ýazgarmanyň dargadyp bilmeýän gatnaşyklara biziň her birimiz hem mätäçdiris.

Bu diýmeklik, ýygnagyň ýolbaşçylay we beýleki agzalary bilen sende hiç hili kynçylygyň bolmajakdygyny aňladýan däldir. Emma her bir dürli pikirliligi özüňiň nädogry ýerde durýanlygyň hökmünde kabul etmeli dälsiň. Her bir gatnaşyk hem kämilleşdirilmäge we arassalanmaklyga mätäçdir. Gatnaşykdaky kynçylyklary ýeňip geçmiklik — dostlugy diňe baýadýandyr. Emma her dürli bolsa-da, biziň ruhy maşgaladaky gatnaşyklarymyz dileg goldawyna mätäçdir.

Seniň duşmanyň seni ruhy maşgalaňyň ýa-da Hudaýyň adamlarynyň arasynda görmeklik islemeýändir, çünki saňa bu dostlugyň neneň oňat täsir etjekdigini ol bilýändir. Ol ruhy maşgalaňyň kömegi bolmasa, seniň ruhda ösüp bilmejekdigiňi bilýär. Ol ruhy maşgalaňa birikmekligiň bolmanynda, oňa özüňi bagyş etmäniňde, isläp-islemeýändigiňe seretmezden, seniň nägileleriň arasynda boljakdygyňy bilýändir. Öz ruhy maşgalaňyň agzalary bilen gatnaşygy saklamasaň, onda Hudaýyň ýaradyşy ýaly özüňiň bolup bilmejekdigiňi duşmanyň gowy bilýändir. Şonuň üçin hem ol seni bu gatnaşykdan aýyrmaklyk üçin elinden gelenini edýändir we şonuň üçin hem sen çyn ýürekden ynanýan adamlar bilen özüňiň gatnaşygyň hakynda dileg etmelisiň.

Hudaýyň erki babatdaky dört hakykatlar

1. Hudaýyň erkini ýerine ýetirmeklik kynçylyklardan doly azat bolmaklygy wada berýändir. Ýaşaýşyň dolulygyny duýmaklyk we betbagtçylyklaryň arasynda parahatlyk — ine, Hudaý bize nämeleri berjekdir. Hudaýyň erkine laýyklykda hereket edip, Oňa ýaranjaňlyk etmekligiň saňa durmuşyňdaky agyr kynçylyklary ýeňmeklige güýç berýändir. Bilip goýgun: durmuşyňdaky betbagtçylyklar we ajylar Hudaýyň seni ýadyndan çykarandygynyň alamaty däldir, çünki Hudaý gaýgylary biziň kämil bolmagymyz üçin ulanýandyr. Hudaýdan iberilen synaglary başdan geçirmeklik bilen Hudaý tarapyndan ýatdan çykarylmagyň arasynda uly tapawut bardyr. Iki ýagdaýda-da oňaýsyzlygy duýýandygyňa seretmezden, biri ýaşaýşa eltýändir, beýlekisi bolsa ölüme. Birinde sen ähli oňaýsyzlyklara seretmezden, parahatlyga eýe bolýansyň, beýlekisinde bolsa — ýok.

2. Hudaýyň erkini ýerine ýetirmeklik — aňsat iş däldir. Hudaýa gulak asyjy bolmaklygyň gyzykly we ýeňil mesele däldigini Isanyň durmuşy hem subut edýändir. Isa haçdaky ölüme gideninde, Ol Hudaýyň erkini ýerine ýetirdi. Ol şeýle diýdi: «…Men Öz islegimi däl-de, Meni Ibereniň islegini berjaý etmek üçin Gökden indim» (Ýahýa 6:38). «Men şu gün Seniň erkiňe tabyn bolmaklygy islemeýärin» diýip, diňe Isa aýdyp bilerdi, emma Ol bu sözleri aýtman, Atanyň erkini ýerine ýetirdi. Häzir bolsa Ol biziň hem şeýle edip bilmegimize kömek edýändir.

3. Hudaýyň erkini ýerine ýetirmeklik ençeme oňaýsyzlyklar bilen baglydyr. Aç-açan aýdanymda, eger sen Hudaýyň ýollaryndan ýöremekligiňde hiç hili basgyny ýa-da oňaýsyzlyklary duýmaýan bolsaň, onda seniň hakykatdan hem Hudaýyň erkini ýerine ýetirýänligiňde şübhelenip bilmeklige mende esas bardyr. Betbagtçylyklaryň we oňaýsyzlyklaryň hakykatdan hem Hudaýa gulak asmaklykda ýöreýänleriň ýanýoldaşynyň bolýandygyna men öz tejribämde göz ýetirdim.

4. Hudaýyň erkini ýerine ýetirmeklik aň ýetirmeklik bilen bolup geçýändir. Hudaý bize saýlaw etmeklik hakyny hödürleýändir: Onuň erkine tabyn bolmaklyk ýa-da ýok. Bu saýlawy biz her gün hem edýändiris. Biz Onuň erkini agtarýarysmy? Ondan akyldarlyk soraýarysmy? Onuň buýruk berşi ýaly hereket etmegi isleýärismi? «Munuň üçin akmak bolman, Rebbiň isleginiň nämädigine düşüniň» (Efesliler 5:17). Her gün çözgütleri kabul etmeklik bilen, biz Onuň erki bilen özümiziň hususy erkimiziň arasynda saýlaw edýändiris.

Seniň öz teniňiň keýpi üçin ýaşamagyňy Hudaý isleýän däldir, seniň Öz erki boýunça ýaşamaklygyňy Ol isleýändir (1 Petrus 4:2 seret). Ine, Hudaýyň erki: «Öz halanyny Isa Mesih arkaly sizde amala aşyryp, Öz islegini ýerine ýetirmegiňiz üçin, sizi ähli oňat işde kämilleşdirsin» (Ýewreýler 13:21). «Hudaýyň her isleginde kämil bolup, doly ynam bilen duruň diýip» men seniň üçin dileg edýärin (Koloseliler 4:12).

Hudaýyň erkini tanamaklygy Oňa bolan minnetdarlykdan başlamaklyk iň oňadydyr: «Ähli ýagdaýda şükür ediň. Çünki Hudaýyň Mesih Isada siz baradaky islegi şudur» (1 Selanikliler 5:18). Özüň hakynda Hudaýyň alada edýänligi üçin minnetdarlyk aýt, soňra bolsa her ädimiňe Onuň ýolbaşçylyk etmekligi hakynda sora. Özüňiň dogry ýolda durup, Hudaýa ýaraýan işleri edýändigiňe ynamlylygy duýmaklyk şeýle bir ajaýyp welin, hatda şu duýgy üçin dürli oňaýsyzlyklar bilen ylalaşmaklyk ýerlikli bolýandyr.

Dileg

Akyldarlykda gezmekligiň on sany dogry usuly

1. Hudaýyň Sözünde bolmaklyk. «Oglum, hikmete gulak asyp, ýüregiňi düşünjä tarap ýykgyn etdirer ýaly, Sözlerimi unap, tabşyryklarymy ýüregiňde ýygşyrsaň; Hawa, paýhasy çagyrsaň, düşünje üçin gygyrsaň; Ony kümüş kimin gözleseň, gizlin hazyna kimin agtarsaň; Rebden gorkmalydygyna şonda düşünersiň, Hudaýy tanarsyň» (Süleýmanyň tymsallary 2:1–5).

2. Akyldarlyk almaklyk hakynda dileg etmeklik. «Siziň biriňize akyldarlyk ýetmezlik edýän bolsa, ol hemmelere jomartlyk bilen käýemän berýän Hudaýdan dilesin, oňa berler» (Ýakup 1:5).

3. Ähli zatda Hudaýy tanamaklyk. «Bütin ýollaryňda Ony tana, Ol hem seniň ýodalaryňy dogrular» (Süleýmanyň tymsallary 3:6).

4. Hudaýyň öňünde titremede we hormat goýmaklykda ýöre. «Rebden gorkmak akyldarlygyň başlangyjydyr we Mukaddesi tanamak düşünjedir» (Süleýmanyň tymsallary 9:10).

5. Akylly adamlary diňlemek. «Gulak as-da, akyldarlaryň sözlerini diňle, ýüregiňi meniň bilimime gönükdir» (Süleýmanyň tymsallary 22:17)

6. Akyldarlygy ähli zatdan hem gymmatbaha görmek. «Hikmet gazan, düşünje gazan; unutma, agzymdan çykan sözlerden ýüz öwürme. Ony taşlama, ol seni gorar; ony söý, ol saňa gözegçilik eder» (Süleýmanyň tymsallary 4:5–6).

7. Gulak asmaklykda gezmeklik. «Ol gönüler üçin sagdyn maslahat saklaýandyr; Ol adalat ýollaryny goramak üçin, aýypsyz gezýänlere galkandyr we takwalarynyň ýollaryny goraýandyr» (Süleýmanyň tymsallary 2:7–8).

8. Pes göwünli bolmaklyk. «Tekepbirlik gelse, utanç gelýändir; akyldarlyk bolsa pes göwünliler bilendir» (Süleýmanyň tymsallary 11:2).

9. Öz ýanyňdakyny söýmeklik. «Öz dostuny kemsidýäniň düşünjesi kemlik edýändir; düşünjeli adam bolsa ümsüm galýandyr» (Süleýmanyň tymsallary 11:12).

10. Dünýäniň däl-de, Hudaýyň akyldarlygyny agtarmaklyk. «Siz Hudaýyň saýasynda Mesih Isadasyňyz. Ol biziň üçin Hudaýyň akyldarlygy we dogrulygy, mukaddesligi we gutaryşy boldy» (1 Korintoslylar 1:31). «Akyldar hany? Kanunçy hany? Bu döwrüň alymy hany? Hudaý bu dünýäniň akyldarlygyny akmaklyga öwürmedimi? Çünki dünýäniň Hudaýyň akyldarlygynda öz akyldarlygy bilen Hudaýy tanamadygyna görä, Hudaý iman edenleri wagyz akmaklygy arkaly gutarmagy unady» (1 Korintoslylar 1:20–21).

Hudaý seni azat etmegi isleýär

Özüňiň başyňdan geçirip biljemek bolup görünýän maddy taýdan kynçylyklaryň bolýarmy? Seni şol bir betbagtçylyklar, anyk kesgitläp we sagaldyp bolmadyk bir kesel yzarlaýarmy? Saňa özüňiň ähli gazananlaryňyň hiç-de parhy ýok ýaly bolup görünýärmi? Güýçli içgiler, temmäki, neşe, bihaýaçylykly filmler, humarly oýunlar saňa azat berýärmi? Sen olara bolan höwesleri duýýaňmy? Seni ahlaksyz durmuş özüne çekýärmi? Belki-de, sen ähli synanyşyklaryňa seretmezden, özüňe duşman bolan adamyňa gatnaşygyňy üýtgedip bilýän dälsiň? Belki-de, durmuşyňda uly rol oýnaýan adam bilen seniň gatnaşyklaryň kyndyr?

Saňa Hudaý özüňden uzak ýaly bolup görünýärmi? Dilegleriňi hiç kim hem eşitmän, olara jogap almaýandygyň ýaly hem bolup görünýärmi? Durmuşyňda Hudaýdan gelýän şatlyk däl-de, lapykeçlik we umytsyzlyk höküm sürýärmi? Şol bir kynçylyga ýa-da gylyk-häsiýete öwrüm-öwrüm dolanyp gelip, şol bir ýalňyşlaryňy gaýtalandygyň saňa görünýärmi? Özüňden kanagatlanmazlyk duýgusy üstüňden agalyk edýän ýaly bolýarmy? Eger sen şu soraglaryň hiç bolmanda birine «hawa» diýip jogap beren bolsaň, onda mende seniň üçin hoş habar bar: Hudaý seni azat etmegi isleýär. Ol seniň Halasgäriň bolmaklygy isleýär (Rimliler 11:26 seret) we ölüm üçin niýetlenenleri halas etmek isleýändir (Süleýmanyň tymsallary 24:11 seret).

Duşmanyň seniň her bir gowşaklygyňy ulanyp, ony saňa garşy gural hökmünde gönükdirmegi isleýändigini sen bilýärsiňmi? Biz köplenç şeýtanyň meýilnamalary bilen ylalaşyp, bar zady üýtgetmäge güýjümiziň bardygy hakynda bolsa hiç zat hem bilýän däldiris. Özümize ýöne bagt ýylgyranok diýip, ykbalymyz şeýledir diýen pikir bilen ruhdan düşýändiris. Hakykatda bolsa duşman bize garşy hereket edýändir. Emma bizi hut şularyň ählisinden azat etmeklik üçin hem Isa ýere geldi. Ol bizi gyrmaga synanyşýan duşmany ýeňmek üçin geldi. Hudaý ýesirleriň we ezilýänleriň ahy-nalalaryny eşidýändir (Mezmur 102:20–21 seret). Eger sen Oňa nalyş edýän bolsaň, Ol seni azat eder. Çünki Mukaddes Kitapda şeýle diýlendir: «Şonuň üçin hem Ogul sizi azat etse, siz hakykatdan hem azat bolarsyňyz» (Ýahýa 8:36). Duşmanyň neneň güýli bolýandygyna seretmezden, Hudaý seni azat edip bilýän täsin güýje eýedir.

Hudaý diňe seni söýüp, saňa haýpy gelýändigi üçin däl-de, eýsem seniň Özüne hormat bilen mukaddeslikde we hakykatda Onuň öňünde bütin ömrüňde hyzmat etmekligiňi isleýändir (Luka 1:74–75). Elbetde, biz ýamanlykdan daş durmalydyrys. Mukaddes Kitapda şeýle diýilýändir: «Gönüleriň ýoly ýamanlykdan sowulmakdyr; ýoluna dykgat edýän janyny goraýandyr» (Süleýmanyň tymsallary 16:17). Elbetde, biz öz durmuşymyzda bolup geçýänlere hökman jogapkärdiris, emma durmuşymyzda duşmanyň hem hereket edýändigini ýadymyzdan çykarmaly däldiris. Duşmanyň öz üstümizden bolan ygtyýarlygyndan biz hökman azat bolmalydyrys.

Erbet duýgulardan azat bolmaklygyň ýedi sany dogry usullary

1. Howsalalygy terk et. Durmuş ýollarynda duş gelýän böwetleriň näçe çynlakaý bolýandygynyň parhy ýokdur. Ýöne olary Isanyň ýeňendigi hakynda ýadyňda sakla. «Bu zatlary Mende parahatlygyňyz bolsun diýip aýtdym. Dünýäde gaýgy-gussaňyz bolar, emma mert boluň. Men dünýäni ýeňendirin» (Ýahýa 16:33). Biz ýöne Hudaýyň barlygynda bolmaklyk arkaly howsalalardan azat bolýandyrys. «Içimdäki aladalar artanda Seniň teselliň janyma rahatlyk berýär» (Mezmur 94:19).

Howsalalygy we ynjalygy duýmaklyk bilen, biz özümiz barada alada edip bilýän Isa ynanmagymyzy bes etdirýändiris. Emma eger sen Oňa ýüz tutsaň, onda Ol hökman Özüniň wepalylygyny subut edýändir. «Siz-de näme iýjegiňizi, näme içjegiňizi agtarmaň, gaýgy etmäň. Çünki dünýäniň milletleri bularyň hemmesini agtarýarlar, Ataňyz hem bularyň size gerekdigini bilýär. Hudaýyň patyşalygyny agtaryň, bu zatlaryň hem bary size onuň üstüne goşulyp berler. Gorkma, eý kiçijik süri! Çünki Ataňyz Patyşalygy size bermäge razy boldy» (Luka 12:29–32). Biz hiç bir zat hakynda alada etmän, diňe dileg etmelidigimizi Hudaý bize aýdýar.

2. Gahary terk et. Ýygy-ýygydan gaharlanmaga özümize rugsat bermeklik bilen, biz Hudaýyň patalarynyň öz durmuşymyza girmegine bolan ýoly bekleýändiris. Adamlaryň gaharlanyp, öz durmuşlaryna Hudaýyň girmekligine päsgel berendiklerine men ençeme gezek şaýat boldum. Gahara öz janlarymyzyň üstünden agalyk etmekligine rugsat bermeklik bilen, biz günä we şeýtana gapylary açýandyrys. «Gaharlanyň, ýöne günä etmäň. Gaharyňyzyň üstüne gün ýaşmasyn. Iblise ýol bermäň» (Efesliler 4:26–27).

Gaharlanan adam töweregindäki ähli zatlary ýumrudýandyr we netijede bolsa çynlakaý ýalňyşlyklar edýändir. «Gaharjaň adam jenjel turuzýandyr; gyzma adamyň jenaýaty köpdür» (Süleýmanyň tymsallary 29:22). Nädip ençeme erkekler gaharda öz aýallaryny urup, käwagtlar bolsa hatda öldürýän wagtlary hem bolýandyr we netijede öz durmuşlaryny mydamalyk öldürýändirler! Näçe aýallar öýkeläp, maşgalalaryny we adamlar bilen gatnaşyklaryny dargadýarlar we neitjede Hudaýyň özleri üçin taýýarlanyny gurban edýärler! Diňe samsyk adam gaharlanmaga çaltdyr, akylly adam bolsa gahary sebäpli öz durmuşyny gurban bermekligi isleýän däldir. «Gaharlanmakda ruhuňda alňasaklyk etme; çünki gaharlanmak akylsyzyň gursagynda dynç alýandyr» (Wagyzçy 7:9). Hudaýyň wada berýän patalaryna eýe bolup bilmekligiň üçin özüňi gaharlanmakdan goramaklygyny Hudaýdan dile.

3. Nägileligi terk et. Erbet zatlara ünsüňi jemläp, öz durmuşyňdaky ýetmezçilikleri gözlemeklik bilen meşgullanmaklyk neneň ýeňildir! Emma şeýle bolanynda rahatlygyň we şatlygyň bolmazlygy adamy we onuň töweregindäkileri betbagt edýändir. Durmuşyňdaky wajyp we hökmany bolan üýtgeşikleri islemekde hiç bir ýaman zat ýokdur. Emma bu pikir zorluk bilen ornaşdyrylýan bolsa, onda biz özümiziň içki rahatlygymyzy gurban edýändiris. Her gezek synaglara düşeniňde, resul Pawlusyň sözlerini ýadyňa sal: «Bulary ýetmezçiligimiň barlygy zerarly diýmeýärin, çünki her hili ýagdaýda baryma kaýyl bolmagy öwrendim. Mätäçlik çekmegi-de, bolelin ýaşamagy-da bilýärin. Her hili ýagdaýda hem doklugyň, hem açlygyň, hem bolelin ýaşamagyň hem-de mätäçlikde bolmagyň syryny öwrendim. Özümi güýçlendirýän Mesih arkaly her zady etmegi başarýaryn» (Filipililer 4:11–13). Hudaý saňa rahatlygy wada berýändir: «Şeýlelikde, Hudaýyň halky üçin ýene bir sabat gününiň dynçlygy galýar» (Ýewreýler 4:9). Her bir ýagdaýlarda-da rahatlygy we şatlygy tapyp bolýandyr. Öz öňüňde şeýle meseläni goýýandygyňy Hudaýa aýdyp, Ondan kömek dile.

4. Göripçiligi terk et. Sen Hudaýa we Onuň baýlygyna gözüňi dikmän, beýleki adama we onuň baýlygyna gözüňi dikeniňde, göripçilik etmekligiň ruhy saňa ýolbaşçylyk edip başlaýandyr. «Çünki nirede içigaralyk, igenjeňlik bar bolsa, ol ýerde başbozarlyk, her hili erbet iş hem bardyr. ma Gökden inen akyldarlyk ilki bilen, sap, ondan soň-da parahatlyk söýüji, mylaýym, diýenediji, rehimden, oňat miwelerden doly, ýüz görmezek we ikiýüzlülikden halasdyr» (Ýakup 3:16–17). Şeýle pikir etmekligiňe özüňe erk berme: «Eger mende onuňky ýaly saçym bolsady, onuňky ýaly tenim, onuňky ýaly eşigim bolsady! Eger mende onuň başarjaňlygy, onuň ukyplary, onuň baýlyklary we patalary bolsady!.. Eger mende onuňky ýaly ärim, onuňky ýaly çagalarym bolsady!» Munuň deregine ünsüňi Isa gönelt. Onuň gözelligi hakynda, Onuň baýlygy, sylaglary, häsiýeti, kömekleri we güýji hakynda oýlan. Özüňe galdyran baý mirasy üçin Oňa minnetdarlyk bildir we oňa eýe bolar wagtyňa garaşmaga sabyrlygyňyň ýokdugyny aýt.

Habyldakylara Kabylyň eýe bolmaklyk isläninde, dünýä göripçilik giripdi we şonuň üçin hem Kabyl öz doganyny öldüripdi. Emma soň Kabyl özüniň jenaýaty üçin bütin ömür ejir çekip geçdi. «…Sebäbi araňyzda içigaraçylyk, çekişme we dawanyň barlygyna görä, siz tebigy adamlar dälmi? Adam adaty boýunça gezmeýärsiňizmi?» (1 Korintoslylar 3:3). Özümize degişli bolmadyk zada açgözçilik bilen eýe bolmaklygymyz zerarly biz bütin ömür ejir çekmekligi islemeýändiris. Göripçilik üçin biziň töleýän bahamyz gaty ýokarydyr. «Asuda ýürek bedene ýaşaýyşdyr; göriplik bolsa süňkleri çüýredýändir» (Süleýmanyň tymsallary 14:30). Hudaýyň söýgüsi hakynda şaýatlyk edip bilmekligiň we ony adamlara görkezip bilmekligiň üçin dileg et. «Söýgi sabyrlydyr, şepagatlydyr, söýgi göripçilik edýän däldir, söýgi öwünip, tekepbirlik edýän däldir» (1 Korintoslylar 13:4).

5. Depressiýany terk et. Ýüregiň ähli erbet duýgularyndan hem depressiýa iň erbedi hasaplanylýandyr. Köp adamlar depressiýada ýaşaýarlar we munuň şeýledigine özleri hem düşünip bilmeýärler. Ruhuň sussupes bolan ýagdaýlary hemmelere hem bellidir we şonuň üçin hem şeýle ýagdaýda bolmaklyk tebigy diýip hasaplanylýandyr. Emma Hudaý seni sussupes görmek islemeýär.

Mukaddes Kitabyň gahrymanlarynyň ençemelerine depressiýa ýagdaýlary tanyşdyr. «Men iňňildemekden ýadadym; her gije aglamakdan düşegimi gark edýärin. Gözýaşlarym bilen ýorganymy öl edýärin. Gözüm gussadan ýaňa kütelýär; köplüginden ýaňa tapdan düşýär» (Mezmur 6:6–7). «Ryswalyk ýüregimi döwdi, men dertli; bir rehimlä garaşdym, emma ýokdy, göwünlik berijä garaşdym, emma tapmadym» (Mezmur 69:20). «Gaýgydan ýaňa süňňüm ereýär; sözüňe laýyklykda meni güýçlendir» (Mezmur 119:28). Emma bizi şeýle ýagdaýda Hudaýyň görmek islemeýändiginde oňat habar jemlenendir. Ol Özüniň şatlygynyň bizde bolup, depressiýanyň ruhuny kowmaklygyny isleýändir. «Reb ýalbaryşymy eşitdi; Reb dilegimi kabul eder» (Mezmur 6:9). Bizi galdyryp, depressiýa ýagdaýyndan çykarmaklyk üçin Hudaý biziň nalyşlarymyzy eşitmek isleýändir.

6. Ajyny terk et. Sirke nädip derini ýakýan bolsa, ajy hem biziň tenimizi şeýle ýakýandyr. Eger ajy duýgusy saňa eýelik edýän bolsa, onda sen Hudaýyň patalaryndan mahrum bolýansyň. «Men seniň ajy ötden doludygyňy we erbetlik bilen baglydygyňy görýärin» (Resullaryň işleri 8:23). Eger sen mezmurçy ýaly öz-özüňden: «Ýüregim bütin gün gussaly bolup, haçana deňeç janym aladalansyn? Haçana deňeç duşmanym üstüme abanar?» (Mezmur 13:2) diýip soraýan bolsaň, onda diýmek bu ajynyň ýüregiňde berk kök urup, edil rak keseli kimin çişi emele getirendigini aňladýandyr. Ýöne biz şuňa meňzeş pikirleri terk edip, olardan azat bolup bilýändiris. Olara garşy durup bilmegimiz üçin biz Hudaýdan kömek diläp bilýändiris. «Dykgat ediň, hiç kim Hudaýyň merhemetinden mahrum galmasyn. Bir ajy kök gögerip, sizi ynjalyksyz etmesin, köp adamlar munuň bilen hapalanmasyn» (Ýewreýler 12:15).

Her bir ajydan özüňi Hudaýyň azat edip, onuň deregine minnetdarlyk, öwgi we sežde etmeklik ruhundan boldurmagy hakynda dileg et. Hudaýdan bolmadyk ähli zady ýüregiňden Mukaddes Ruhuň kowmaklygy hakynda haýyş et.

7. Umytsyzlygy terk et. Umytsyzlyk — bu seniň teniňe we janyňa täsir edip, dessine däl-de, haýallyk bilen öldürýän duşmandyr. Ýöne sen ähli umytlaryňy Hudaýa baglamaklyk kararyny kabul etseň, Ol seniň ähli mätäçlikleriňi doldurar we seni umytsyzlyk duýgusyndan azat eder. Her bir durmuş ýagdaýlaryna bolan gatnaşygymyza laýyklykda, biz şu gün ähli umydymyzy Hudaýa baglamaklygy çözüp bilýändiris. Öz janlarymyzy saklamaklygyň serişdesi şu gün bizde bardyr. «Azgyn adamyň ýolunda tikenler we kementler bardyr; janyny goraýan olardan uzak bolar» (Süleýmanyň tymsallary 22:5). Umytsyzlyk — bu janyň üçin ölümdir. Ony terk etmeklik kararyny kabul et. Durmuşyňyň özüňe neneň tümlük kimin bolup görünýändigine seretmezden, sen mydama Hudaýda ynamly bolup bilýänsiň. Geljege bolan umydy bermekligi we ýüregiňi minnetdarlykdan doldurmaklygy hakynda Hudaýdan haýyş et.

Erbet duýgularyň arkasynda şübhe gizlenýändir. Hudaýa doly bil baglanlar üçin howsalalyga sebäp barmydyr? Olarda gahar, lapykeçlik, göripçilik, öýkeleme we umytsyzlyk üçin esas barmy? Elbetde, durmuşymyzyň ol ýa-da beýleki ýagdaýlarynda biziň ählimiz hem erbet duýgularyň täsirine duş bolýandyrys, şonuň üçin hem olar peýda bolanynda, aljyraňňylyga düşmekligiň geregi ýokdur. Emma olar saňa uzak wagtlap eýeçilik etmeli däldir. Bu erbet duýgulary terk et-de, olary öz durmuşyňa goýberme. Olaryň ölüm getirýän täsiriniň durmuşyňa ýaýramagyna we netijede Hudaýyň özüň üçin taýýarlan ajaýyp zatlaryny murdar etmekligine ýol berme.

Durmuşymyzda kynçylyklaryň peýda bolmagynyň dört esasy sebäpleri

1. Käwagtlar Hudaýyň şöhratynyň bize aýan bolup, bizde açylmagy üçin kynçylyklar peýda bolýandyr. Isa bir gezek doglanyndan bäri kör bolan bir adamyň ýanyndan geçeninde, şägirtleri ol adamyň körlügi onuň özüniň we ata-enesiniň günäleriniň netijesi bolup bilýän-bilmeýänligi hakynda sorapdylar. Isa olara şeýle jogap berdi: «Ne munuň özi günä etdi, ne-de ene- atasy; bu onda Hudaýyň işleriniň görkezilmegi üçin boldy» (Ýahýa 9:3). Durmuşymyzda ol ýa-da beýleki wakalaryň näme üçin bolup geçýändigine biz hemişe düşünýän däldiris. Eger-de Hudaýa gelmesek, onda olaryň sebäbini hiç-de bilmezligimiz hem mümkindir. Emma eger sen belalaryň jümmüşinden Hudaýa nalyş edýän bolsaň, onda Onuň şöhraty saňa aýan bolup, sende açylar.

2. Hudaý kynçylyklary bizi arassalamak üçin ulanýandyr. Mukaddes Kitapda şeýle diýlendir: « Mesihiň biziň hatyramyza tende görgi görşi ýaly, siz hem şol pikir bilen ýaraglanyň…» (1 Petrus 4:1). Diýmek, kynçylyklar arkaly biziň günälerimiz we men-menlimiz «oda ýakylýandyr». Biziň öz erkimizi däl-de, Onuň erkini ýerine ýetirip, özümiz üçin däl-de, Onuň üçin ýaşamagymyz üçin Hudaý synaglary biziň durmuşymyza iberýändir. Käwagtlar bu ýeňil we ýakymly bolýan däldir, emma Hudaý Özüniň mukaddesliginde biziň hem paýymyzyň bolmagyny isleýändir (Ýewreýler 12:10 seret). Öz ten isleglerimizden azat bolup, Özüne ýapyşmaklygymyz Hudaý üçin ýakymlydyr.

3. Bizi terbiýelemeklik maksady bilen Hudaý durmuşymyzda kynçylyklaryň peýda bolmagyna ýol berýändir. «Her hili terbiýe berilmek öňürti şatlykly zat däl-de, gaýgyly zat bolup görünýändir. Ýöne bu soňra şeýle ýetişdirilenler üçin dogrulygyň dynçlyk miwesini öndürýändir» (Ýewreýler 12:11). Hudaýyň şeýle sapagyndan soň getirilen miwe kynçylyklara göz gelmeklige mynasypdyr. Biz bolsa öz gezegimizde, Hudaýyň temmisine garşy durmazlyk üçin elimizden gelenini etmelidiris. «Ogullara: “Oglum, Rebbiň terbiýe berşini äsgermezlik etme, Ol saňa käýände ruhdan düşme!” diýip aýdylyşy ýaly, özüňize berlen bu öwüdi-de unutdyňyz. Çünki Reb söýýänini terbiýeleýändir, Ogullyga kabul edenini çalýandyr. Terbiýelenmek ugrunda kynçylyklara çydaýarsyňyz. Hudaý sizi Öz ogly kimin tutýar. Çünki haýsy ogla atasy terbiýe bermeýär?» (Ýewreýler 12:5–7).

4. Käwagtlar biz duşmanyň duzaklaryna düşýäris. Sen betbagt bolanyňda, duşman begenýändir, çünki onuň maksady seni öldürmeklikdir. Gahar, gaýgy we öýke ýaly erbet duýgulary başyňdan geçirmegiňe köplenç hut şeýtan jogapkärdir. Emma munda ne seniň, ne-de başga biriniň günäsi bardyr. Eger sen gaýgylaryň içinde Hudaýa öwgi aýdyp bilýän bolsaň, onda Hudaý duşmany ýok edip, durmuşyňy bolsa göz öňüne getirip bilmeýşiň ýaly üýtgedýärdir. Hut şunda hem seniň üçin uly teselli bardyr. Hudaý seniň Öz yzyna eýermegiňi isleýändir we şonda kynçylyk pursatlarynda Ol saňa Özüne doly ynanmaklygy öwredýändir.

Kynçylyklaryň biziň ýagşylygymyz üçin iberilýändigini hiç kim eşitmek islemeýändir, ýagny biziň başymyza inýän agyrylar, gaýgylar, ýitirimler we lapykeçlikler ahyrynda özümiz üçin peýdalydyr. Öz kynçylyklarymyzda biz başymyzdan geçirýän agyry hakynda oýlanman bilmeýändiris. Ýöne bize mydama kömek etmäge taýyn bolan Mukaddes Ruh bardyr. Mukaddes Kitabyň käbir terjimelerinde Oňa Kömekçi hem diýilýändir. Isa şeýle diýdi: «Men-de Atama ýalbararyn, Ol size, hemişe siziň bilen bolar ýaly, başga bir Göwünlik Beriji, ýagny Hakykat Ruhuny berer. Hakykat Ruhuny dünýä kabul edip bilmez, çünki dünýä Ony ne görýär, ne-de tanaýar. Ýöne siz Ony tanaýarsyňyz, çünki Ol siziň araňyzda ýaşaýar we siziň içiňizde bolar» (Ýahýa 14:16–17). Kömek we teselli üçin Mukaddes Ruha ýüzlenenimizde, Ol bize ýöne bir kömek etmän, hatda Özüne hem ýakynlaşdyrýandyr. Biz «aglaýanlar» hökmünde bagtly bolýandyrys, çünki Göwünlik beriji bize teselli berýändir (Matta 5:4 seret).

Birnäçe ýyl mundan ozal rak sebäpli meniň joram aradan çykanynda, men ýöne gaýga batypdym. Biz mekdep ýyllaryndan bäri joralardyk we bu ýitgini nädip başymdan geçirip biljekdigime göz ýetirip bilmeýärdim. Jaýlanymyzdan soňky birinji gün maňa gaty agyr boldy. Men ajy hakykat bilen hiç-de ylalaşyp bilmedim we gözýaşlar derýa bolup gözlerimden akýardy. Galyberse-de, onuň sekiz ýaşly ogly meniň elimde galypdy, ýagny men ol hakynda alada etmelidim (şonda meniň bireýýäm iki çagam bardy — biri alty, beýlekisi bolsa sekiz ýaşyndady). Men gaçany-da köşeşdirip bilmekligim üçin, Hudaýyň özüme kömek etmegini soradym. Her gezek kömek we teselli üçin Hudaýa ýüzlenenimde, Ol her gezek hem maňa jogap berdi. Men muny günde edýärdim.

Her gezek sen öz agyryňdan üstün bolanyňda, Hudaýyň ýagşylygyna, parahatlygyna we yşygyna eýe bolýarsyň, ynamyň bolsa ösýändir. Hudaý saňa betbagtçylyklaryň içinde ýöne bir teselli bermän, hatda beýlekileriň hem betbagtçylyklarynda olar üçin teselli bolup bilmekligiňe öwredýändir. Eger sen Hudaýyň barlygynda ýaşaýan bolsaň, Onuň şöhraty sende aýan bolar.

Synaglar hakynda ýadyňda saklamaly bolan alty wajyp hakykatlar

1. Kim: özleriniň mesihi ýaşaýyşlary, oňat işleri, ruhy ösüşleri bilen aýratyn gopbamsylyk edenleriň gaty agyr ýykylandyklaryny men gördüm. Olar gaty aşak düşüp, hatda toba hem etmediler. Biziň gopbamsylygymyzyň ýykylmagymyz üçin sebäp bolmaklygyna biz ýol berip bilýän däldiris.

2. Näme: günä etmeklige bizi her bir zat hem itip bilýändir. Aýratyn hem jynjy synagyň duzagyna düşmeklik howpy gaty uludyr. Beýleki synaglaryň hem dürli görnüşleri bardyr, mysal üçin pul, ygtyýarlyk. «Ýöne her kes öz höwesleri tarapyndan çekilip, aldanan mahaly synalýandyr. Onsoň höwes bogaz bolup, günäni dogurýandyr; günä hem ýetişenden soň ölümi dogurýandyr. Eý, söýgüli doganlarym, aldanmaň!» (Ýakup 1:14-16). Seni synaga salmaklyk üçin duşman seniň gowşaklyklaryňy ulanýandyr. Teniňiň höweslerine garşy durup bilmekligiň üçin Hudaýdan güýç sora.

3. Haçan: düzgün bolşy ýaly, garaşmadyk pursadyňda, ýagny iň gowşak ýagdaýlaryňda duýdansyzlykda synag seniň başyňa düşýändir. Synaglara özbaşdak döz gelerin diýäýseň, onda ýalňyşýansyň we uly howpa düşýänsiň. Iň oňady — bu barada Hudaýa gürrüň bermeklikdir. Onsoň ynamly adamy tapyp, onuň bilen derdiňi paýlaşmalysyň we bilelikde dileg etmelisiňiz. Synag birsalymda ýiter diýip umyt etme. Haçan bolup geçýändigine seretmezden, durmuşyňda peýda bolan howp gaty uludyr we hakykydyr.

4. Nirede: synaga ähli ýerde-de düşüp bolýandyr: ýygnanyşykda, iş ýeriňde, öýde, ulagda, uçarda. Seniň garaşmadyk ýeriňde synag peýda bolup bilýändir. Nirede bolup geçýändigine seretmezden, bar güýjüňi ýygnap, özüňi synaga salýan zatdan daşlaş. Eger seni süýji synaga salýan bolsa, onda süýji fabgiriniň ýanyndan geçme, çünki ol ýerde gelýän yslar seniň aklyňy küteldip, seni ýoldan çykarmagy mümkin. Eger sen haýsydyr bir erkek adam zerarly synaga düşýän bolsaň, ondan daş dur. Eger bu mümkin bolmasa, ondan ol adam bilen ýekelikde galma. Seni synaga salýan ähli zatlardan daş dur we her bir mynasyp bolmadyk islege garşy durup bilmekligiň üçin Hudaýdan güýç sora.

5. Näme üçin: durmuşyňda Hudaýyň beýik üýtgeşikleri amala aşyrmaklygy isleýändigini bilýändigi üçin duşman seni synaga salýandyr. Bary-ýogy gysga wagtlyk keýplenme üçin ähli zatdan geçmeklige seniň aklyňyň ýetýändigine şeýtan umyt edýändir. Sen tarapdan edilen günäniň diňe bir özüňe däl-de, beýkilere-de zyýan ýetirýändigini şeýtan bilýändir. Duşman bir wagtda birnäçe maksada ýetmekligi isleýändir. Onuň duzagyny gören dabyňa, onuň öz durmuşyňy we beýlekileriň durmuşlaryny ýok etmäge rugsat bermeýändigiňi oňa aýt.

6. Nädip: synagyňyň nähili bolýandygyna seretmezden, bu seni ýok etmekligi isleýän şeýtanyň eliniň işidigini ýadyňda sakla. Ol seniň gowşak ýerleriňi tapýandyr, nämä mätäçdigiňi bilýändir, seniň ejizligiňi ulanýandyr we seniň günä etmekligiň üçin bar güýjüni gaýgyrmaýandyr. Hut şunuň üçin hem biz özümiziň gowşaklyklarymyzdan azat bolup, bir bütewi şahsyýet bolmalydyrys. Şeýle etmeklik bilen biz duşmanyň öz durmuşymaza aralaşmagynyň bar ýoluny bekläp bilýändiris.

Dileg etmekligi synaga düşmeziňiň öň ýanyndan ýerine ýetirmeklik oňatdyr, çünki synag başyňa düşeninden soň, ony ýeňip geçmeklik has-da kyn bolýandyr. Isa biziň ulanyp bilmekligimiz üçin dilegiň nusgasyny galdyrdy: «Bizi synaga salma, bizi iblisden halas et» (Matta 6:13 seret). Duşmana Hudaýyň sözi bilen gaýtargy berip, biz Isanyň mysalyna eýerip bilýändiris. Şeýlelikde, biz Mesihiň özümize beren azatlygynda berk durup, gulçulyk boýuntyrygyny gaýtadan saldyrman bilýändiris (Galatýalylar 5:1 seret). Biz Rebbimiz Isa Mesihiň ady bilen sorap bilýändiris, çünki Ol synalanda, Özüniň görgi gören zatlarynda synalýanlara kömek bermegi-de başarýandyr (Ýewreýler 2:18 seret).

Synag seniň başyňa düşüp bilmez diýip, hiç haçan hem pikir etme. Näçe uly boldugyňça, şonça-da duşmanyň oklary üçin nyşan bolmaklygyňyň mümkinçiligi uludyr. Köp adamlar uly ýaşda Hudaýdan daşlaşýandyrlar, çünki olar indi özbaşdak synaglara döz gelip bileris diýip oýlaýarlar. Gysga wagtlap ynanýan, synag döwründe bolsa ynamdan gaçýan adam bolmaklyk mümkin däldir (Luka 8:13 seret). Synaga düşmezleri ýaly dileg etmeklerini Isa şägirtlerine ündew edipdi. Bu ündew bize-de degişlidir.

Isanyň hut durmuşynyň we hyzmat etmekliginiň arasyndaky döwürde Onuň başyna synag düşdi. Hut şeýle ýagdaýda, ýagny durmuşyňdaky iň wajyp wakanyň öň ýanynda synag seniň hem başyňa düşüp bilýändir. Muňa mydama taýyn bol we synagyň näçe güýçli bolýandygyna seretmezden, sende Bolan dünýäde bolandan uludyr (1 Ýahýa 4:4 seret). Duşmany ýeňmeklik üçin sende güýç bardyr.

Kynçylygyň iki tarapy

Sagalmaklyk we öz teniň hakynda aladalanmaklyk — bu dürli zatlardyr. Sagalmaklyk hakynda Hudaýa dileg etmeklik bilen, bu ýagdaýyň Onuň işidigini biz bilýändiris, teniň barada alada etmeklik bolsa — bu biziň borjumyzdyr. Olaryň ikisi hem bir ýagdaýda wajypdyr.

Hudaý biziň tebigatymyzy we hiç zady hem kämil etmeklige güýjümiziň ýokdugyny bilýändir. Şonuň üçin hem Ol Isany biziň şypa Berijimiz hökmünde iberdi. Emma şunuň bilen birlikde Ol bizi Öz ýaradanlarynyň, şol hatarda öz tenimiziň hem ýolbaşçylary bolmaklygymyzy buýurdy. Ol biziň sagdyn durmuş alyp barmaklygymyzy, öz tenimiz hakynda alada edip, öz-özümize zyýan ýetirmezligimizi isleýändir. Öz tenimiz barada dogry alada etmeklik bilen Özüni alkyşlamagymyz Hudaý üçin ýakymlydyr, çünki biziň tenimiz Onuň ybadathanasydyr.

Biziň köplerimiz şeýle pikir edýärler: «Iýmitimden we fiziki işlerimden başga mende bar zatlaryň ählisi Hudaýa degişlidir. Iýmitlenmeklik we fiziki işleri etmeklik meniň özüme tabşyrylandyr». Ýa-da: «Meniň durmuşym Hudaýa degişlidir, tenim bolsa özüme. Şonuň üçin hem tenim bilen islänimi edip bilerin». Ýöne eger biz Hudaýa degişli bolsak, onda ähli zadymyzyň bolşy ýaly, tenimiz hem Oňa degişlidir. Tenimiz hakynda alada etmeklik — bu durmuşymyzyň Hudaýa degişli bolmadyk aýratyn bölegi däldir.

Bu işde biziň niýetlerimiz, ýagny öz tenimizi ýaş we owadan saklamaklyga synanyşmaga eltýän hereketlerimiz esasy roly oýnaýandyr. Durmuşymyzyň üstünligi köp babatda biziň şahsy niýetlerimizden baglydyr. Eger biz diňe owadan geýimde owadan görünmeklik üçin dogry iýmitlenip, fiziki maşklary edýän bolsak, onda ýaşymyzyň ulalmagy bilen bu niýet özüniň wajyplygyny ýitirýändir. Emma biz Hudaýyň hereketjeň we sagdyn hyzmatkärleri bolmaklyk niýetimiz bilen dogry iýmitlenip, sport bilen meşgullanýan bolsak, onda biziň hereketlerimiziň netijeleri bakyýetde çüýremez bolýandyr we biz geljekde-de özümizi oňat görnüşde saklap bileris.

Men adamlaryň: «Men öz tenim hakynda aladalanmaýan, çünki kesel bolan ýagdaýymda Hudaý meni sagaldýandyr» diýýänlerini kän eşidýärin. Beýle pikir etmeklik howpludyr we betbagtçylyklara getirip bilýändir. Şeýtan mümkin boldugyndan bize güýçli zyýan ýetirmäge synanyşýandyr, biz bolsa özümize şeýle seretmeklik bilen oňa diňe kömek edýändiris. Öz tenimiz hakynda ýeterli aladalanman, biz öz saglygymyzy ýitirýändiris. Özüňe zyýan ýetirip bilýän ähli zatlardan Hudaýyň özüňi goramaklygy we özüňe peýda getirýän ähli zatlary tertipli bolup ýerine ýetirmekligiň hakynda dileg et.

Ýalan gorky

Adama mahsus bolmaly diňe bir gorky bardyr, bu gorky hem Hudaýyň gorkusydyr. Galan ähli gorkular ýalan gorkulardyr. Hudaýyň öňünde hormat goýmaklygyň gorkusynda ýaşap bilmekligimiz üçin biz dileg etmelidiris. Özümize ejir çekdirýän beýleki gorka bolsa erk bermeli däldiris. Giňden ýaýran ýalan gorkularyň biri — bu adamlaryň öňündäki gorkudyr, adamlar tarapyndan taşlanan bolmaklyk gorkusydyr. Bu duzaga biz köplenç tötänlikde düşýändiris. Kimdir biri däl-de, hut Hudaýyň Özüniň bu barada näme diýýändigini ýada salmaklyk wajypdyr. Özümize baga berlip, söýülmegimiz üçin biz adamlara däl-de, Hudaýa ýüzlenmelidiris. Eger ýüregimizde ilkinji orunda Hudaý duran bolmasa, onda biz hemişe hem adamlardan gorkarys. « Adamdan gorkmak duzak getirýändir; Rebbe bil baglaýan bolsa aman bolar» (Süleýmanyň tymsallary 29:25).

Gorky üçin dünýäde sebäp gaty kändir. Käwagtlar ýüregimizi gorkudan doldurmaklyk üçin täzelikleri diňlemekligiň özi hem ýeterli bolýandyr. Hatda özümiziň hususy hyýallarymyz hem bizi gorkuzyp bilýändir. Emma Hudaý bizi her bir gorkudan hemişelik azat etmegi isleýändir.

Dileg etmeklik sylagy

Köp adamlar öz maşgalalaryny saklamaklykda, çagalaryny we özlerini halas etmeklikde meniň kitaplarymyň gaty kömek edendikleri hakynda maňa ýazdylar. Olar nädip maňa minnetdarlyk bildirip biljekdikleri hakynda menden soradylar. Men bolsa hemişe şol bir jogaby berdim: «Meniň üçin siziň edip biljek iň ajaýyp zadyňyz — bu meniň üçin dileg etmegiňizdir. Meniň işimiň üstünligi üçin, saglygym üçin, maşgalam we nikam üçin dileg ediň. Meniň beýleki kitaplary ýazmagym üçin hem dileg ediň. Goý, ol kitaplar adamlary Hudaýa ýakynlaşdyryp, olaryň durmuşlaryny özgertsin». Keselhanada bolan günlerimde müňlerçe adamlaryň dilegleriniň özümi halas edendiklerine men ynamlydyryn. Eger sen hem şol adamlaryň biri bolýan bolsaň, onda saňa çäksiz minnetdarlygymy bildirýärin. Men siziň dilegleriňizi duýdum we olar sebäpli men şu güne çenli ýaşaýandyryn.

Dileg — bu iň beýik sylagdyr. Ony biz hemmeler bilen paýlaşyp bilýändiris. Elbetde, eger-de biri iýmite, geýimdir ýatmaga jaýa mätäç bolsa, biz kömek etmäge borçludyrys, emma şol bir wagtyň özünde biz ol adamlar hakynda dileg etmekligi ýadymyzdan çykarmaly däldiris. Maddy ýagşylyklar wagtlaýyndyr, biziň adamlar baradaky dileglerimiz bolsa olaryň durmuşlaryny özgerdip bilýändir.

Eger biz beýleki adamlar üçin töwellaçylyk edip bilmeýän bolsak, onda hiç haçan hem Hudaýyň mirasyna eýe bolup bilmeýändiris. Hut şunda biziň çakylygymyzyň iň wajyp bölegi jemlenendir, çünki biz bir-birimiz üçin töwellaçylyk etmeklige çagyrylandyrys. Dilegde bir-birimiz üçin janymyzy bermäge taýyn bolmaklygymyz Hudaýyň islegidir.

2001-nji ýylyň 11 ruhnamasynda (sentýabrynda) Nýu-Ýork, Pensilwaniýa we Waşingtonda bolan adamlar üçin töwellaçylyk dilegi dessine başlandy. Onsoň Birleşen Ştatlaryň ähli künjeklerinden adamlar Nýu-Ýorka tarap ýola düşüp, heläkçilige düşenlere kömek etmäge girişdiler. Olar gan tabşyrmak üçin nobatlarda durýardylar, olar öz garyndaşlaryny ýitiren maşgalalara maddy kömek edip başladylar. Her kim elinden gelenini etdi, emma bularyň barynyň öňünden dileg edildi. «…Diňe bir söz bilen, dil bilen däl-de, iş hem hakykat bilen söýeliň» (1 Ýahýa 3:18). Eger sen Hudaýy söýýän bolsaň, onda adamlary hem söýýänsiň we bu söýgi ol adamlara eliňden gelen kömegi etmäge seni mejbur edýändir. Dileg — bu ýoluň üstünlikli başlangyjydyr.

Özümizde baryny beýlekilere bermekligimiz Hudaý üçin ýakymlydyr. Eger biz beýlekilere kömek etmeýän bolsak, onda Ony söýmeýändigimizi aýdypdy. «Dünýä malyna baý bolup, doganyny mätäçlikde görende, oňa ýüregiýukalyk etmeýän kişide Hudaýyň söýgüsi nähili galar?» (1 Ýahýa 3:17). «Hiç kim öz peýdasyny gözlemesin, başganyň peýdasyny gözlesin» (1 Korintoslylar 10:24). Öz hyzmatyň bilen beýleki adamlara täsir edip bilmekligiň hakynda Hudaýa dileg edip başlanyňda, beýik patalar saňa gökden iner.

Günde näme hakynda oýlanmalydyrys (Filipililer 4:8 seret)

1. Dogry zatlar hakynda. Eger sen dogry, çyn, takyk, hakyky we anyk zatlar hakynda oýlanýan bolsaň, onda ýalan, ýalňyş, nädogry, aldawçy we hakyky bolmadyk zatlar hakynda hiç haçan hem gürrüň etmersiň.

2. Hormatly zatlar hakynda. Eger sen ajaýyp, beýik, täsin, owadan we hormatly zatlar hakynda oýlanýan bolsaň, onda pes, hapa, ýaman, ownuk we hormatsyz bolan zatlar hakynda hiç haçan hem gürrüň etmersiň.

3. Adalatly zatlar hakynda. Eger sen adalatly, akylly, hakyky, kanuna laýyk, dogry we hormatly zatlar hakynda oýlanýan bolsaň, onda aklanylmadyk, kemsidiji, oýlanylmadyk, kanuna laýyk bolmadyk we adalatsyz zatlar hakynda hiç haçan hem gürrüň etmersiň.

4. Tämiz zatlar hakynda. Eger sen aýdyň, arassa, tegmilsiz, hapalanmadyk, haramlanmadyk zatlar hakynda oýlanýan bolsaň, onda bihaýa, gödek, nejis we günäli zatlar hakynda hiç haçan hem gürrüň etmersiň.

5. Ýakymly zatlar hakynda. Eger sen ýakymly, täsin, göwnejaý, ajaýyp zatlar hakynda oýlanýan bolsaň, onda ýakymsyz, masgaralaýjy, duşmançylykly, hileli, nejis we ýigrenç zatlar hakynda hiç haçan hem gürrüň etmersiň.

6. Taryplanýan zatlar hakynda. Eger sen oňat, mynasyp, peýdaly, gerekli zatlar hakynda oýlanýan bolsaň, onda erbet, gereksiz, islenilmedik, ýaman habarlardan, gybatlardan we myş-myşlardan doly bolan zatlar hakynda hiç haçan hem gürrüň etmersiň.

7. Artyk bolan zatlar hakynda. Eger sen ahlakly, dogry we oňat zatlar hakynda oýlanýan bolsaň, onda ahlaksyz, bihaýa, ýaman we betnyşan zatlar hakynda hiç haçan hem gürrüň etmersiň.

8. Öwgä mynasyp zarlar hakynda. Eger sen ýakymly, geň, öwgä mynasyp bolan, gymmatbaha, şöhratly, beýik, dogry we makullanýan zatlar hakynda oýlanýan bolsaň, onda garalanmaga mynasyp bolan, goldawa eýe bolmadyk, kemsidiji, dargatmaga ukyply we lapykeçlige eltip bilýän zatlar hakynda hiç haçan hem gürrüň etmersiň.

Dileg

Isanyň esasy ýedi häsiýeti

1. Isa söýginiň özüdi. Isanyň ýüregi adamzat düşünjesinden üstün bolan söýgüden doludy. Onuň edişi ýaly, biz hiç haçan hem dünýäniň günälerini öz üstümize almaly bolmaýandyrys, emma öz durmuşymyzy beýlekiler üçin gurban etmegimizi Ol isleýändir. «Biz söýgini Onuň Öz janyny biziň üçin pida edeninden tanadyk; biz-de doganlar üçin janymyzy pida etmäge borçludyrys» (1 Ýahýa 3:16). Onuň söýgüsi seniň öz durmuşyňda, özüň bilen gatnaşyk edýän adamlaryňyň durmuşlarynda täsinlikler döredip bilýändir. Beýlekiler bilen näçe kän paýlaşdygyňça, Hudaýyň söýgüsi sende şonça-da ösüp ulalýandyr. «Size bir täze tabşyryk berýärin: biri-biriňizi söýüň, Meniň sizi söýşüm ýaly, siz-de biri-biriňizi söýüň» (Ýahýa 13:34). Adamlar bilen gürrüň edeniňde, Hudaýyň söýgüsini görkezip bilmekligiň üçin dileg et.

2. Isa Özüni kiçeltdi. Isa — älemiň Rebbi, emma muňa seretmezden Ol «sypatda ynsan bolup, ölüme, hatda haç üstündäki ölüme-de boýun egip, Özüni kiçeltdi» (Filipililer 2:8). Özümiziň Onuň bu häsiýetine azajyk bolsa-da eýe bolmagymyz bilen, biz bu dünýäde köp zatlary amala aşyryp bilýändiris, çünki özüňi kiçeltmeklik — has seýrek duş gelýän häsiýetdir. Ýöne bu häsiýet bize gaty gereklidir, çünki tekepbirlik üçin gaty gymmat baga tölemeli bolýandyrys. «Ýüregi tekepbir adam Rebbe ýigrenjidir; hatyrjem bol, ol jezasyz galmaz» (Süleýmanyň tymsallary 16:5). «Heläkçilikden öň tekepbirlik gelýändir we ýykylmadan öň ulumsy ruh gelýändir» (Süleýmanyň tymsallary 16:18). Özüňi kiçeltmeklik häsiýetiňi görkezmeklik bilen sen adamalary çuňňur täsir edip bilýänsiň, çünki seniň özüňi alyp barşyň jemgyýetiň talaplaryna gaty gapma-garşy gelýändir. Özüňi kiçeltmeklik häsiýetiniň töweregiňdäkilere aýan bolmaklygy üçin Hudaýa dileg et.

3. Isa ynamdardy. Isa hiç haçan hem öz ynamyndan ýüz döndermedi we Özüniň ýerdäki etmeli işine şübhelenmedi: «Men — ýol, hakykat we ýaşaýyşdyryn» (Ýahýa 14:6). Hiç zat, hatda şeýtanyň synaglary hem ony ýeňlişe sezewar edip bilmedi. Özümiz üçin Onuň Kim bolýandygyny biz berk bilmeklige borçludyrys. Şeýle-de, özümiziň hem kimdigimizi hökman ýadymyzda saklamalydyrys. Şeýle etsek, onda ýerde berk durup bilýändiris. Edil Isa ýaly özüňiň hem ynamdar bolup bilmekligiň üçin Hudaýa dileg et. Goý, Ol seniň içki durkuňy berkitsin.

4. Isa eli açykdy. Isa şägirtlerini terbiýeläp, olar arkaly adamlaryň ýüreklerine täsir etmeklik maksady bilen Özüni doly şägirtlerine berdi. Köpleriň şypa tapmaklary, azat bolmaklary we täzeden dikelmekleri üçin Isa Öz güýjüni berdi. «Men Reb we Mugallym bolup, siziň aýagyňyzy ýuwan bolsam, onda siz-de biri-biriňiziň aýagyny ýuwmalysyňyz. Çünki siz-de Meniň size edişim ýaly edersiňiz diýip, Men size görelde görkezdim» (Ýahýa 13:14–15). Onuň iň beýik sylagy Özüniň durmuşydy: «Çünki siz şeýle bolmaga çagyryldyňyz, sebäbi Mesih hem Öz yzyny alyp götermegiňiz üçin görgi görüp, size bir nusga galdyrdy» (1 Petrus 2:21). Eger adamlar bilen paýlaşmaga bizde hiç zadymyz bolmasa, onda Hudaý biziň ýetmezçiliklerimiziň öwezini doldurýandyr: «Hemişe hemme zadyňyz ýeterlik bolup, her ýagşy işe bol mümkinçiligiňiz bolar ýaly, Hudaý size her nygmaty boldan bermegi başarýandyr» (2 Korintoslylar 9:8). Özüňi sylaglar bilen doldurmagy hakynda Hudaýdan dileg et. Çünki ol sylaglar bilen sen öz durmuşyňdaky adamlar bilen gerek wagtynda paýlaşyp bilersiň.

5. Isa Özüni dünýäden aýyrdy. Isa dünýäde ýaşady, emma Ol bu dünýä degişli däldi. Ol dünýä täsir etmeklik üçin geldi, emma Ol hiç haçan hem dünýä meňzeş bolmady. Ol dünýäden aýrydy, ýöne şonda-da töweregindäki dünýäni özgertdi. Öz durmuşymyzda hut şeýle deňagramlylygy tapyp bilmekligimiz üçin biz dileg etmelidiris. Bir tarapdan, biz bütinleý bu dünýäden aýry bolup bilmeýändiris, emma beýleki tarapdan bolsa biz bu dünýä meňzeş bolup, onuň kanunlary boýunça ýaşap bilmeýändiris. Eger şeýle etmesek, onda adamlar dünýä bilen biziň aramyzdaky tapawudy hiç-de görüp bilmeýändirler. Isa hiç haçan hem öz maksady hakynda ýadyndan çykarmady. Biz hem şeýle etmeklige çagyrylandyrys. Özüňiň kimdigiňi, nämä çagyrylandygyňy we nirede bakyýeti geçirjekdigiňi ýadyňdan çykarmazlygyň hakynda dileg et.

6. Isa Hudaýa gulak asyjy boldy. Isanyň iň täsin aýratynlygy Onuň Özüniň Reb bolýandygyna seretmezden, Öz erki boýunça hiç bir işi etmändigindedir. Ol Hudaýa dileg etdi we Onuň erki bolmasa, hiç zady hem ýerine ýetirmedi. Biz hem edil şeýle hereket etmelidiris: «Ol nähili gezen bolsa, Onda galýanyny sözleýäniň özi-de şonuň ýaly gezmäge borçludyr» (1 Ýahýa 2:6). Isa ölüme çenli gulak asyjy boldy. Gulak asmaklygyň şundan hem beýik derejesi bolup bilermikä? Ol Özüniň maksatnamasyny ýerine ýetirdi, çünki Özüniň ölüminden we ölülerden direlişinden soň amala aşjak beýik işler hakynda bilýärdi. Biz ondan görelde almaklyga çagyrylandyrys. «Gözümizi imanymyzyň Öňbaşçysy, Kämilleşdirijisi Isa dikeliň. Ol öňüne goýlan begenç ugrunda utanjy äsgermän, haçdaky ölüme döz gelip, Hudaýyň tagtynyň sagynda oturdy. Aryp, ruhdan düşmez ýaly, günäkärleriň beýle uly garşy durmalaryna çydan Isa hakda oýlanyň» (Ýewreýler 12:2-3). Özüňi terk edip, Onuň üçin ýaşap bilmekligiň hakynda Hudaýa dileg et.

7. Isa nur bolupdy. Adamlar yşyga tarap ymtylýarlar we biz hem olaryň özümizdäki Hudaýyň yşygyna tarap ymtylmaklaryny isleýändiris. Isa şeýle diýdi: «Men dünýäniň nurudyryn. Meniň yzyma eýeren garaňkylykda gezmez, onda ýaşaýyş nury bolar» (Ýahýa 8:12). Biz garaňkylykda gezmekligi islemeýändiris; Onuň nurda gezişi ýaly, biz hem nurda gezmekligi isleýändiris. Özüňi Isa meňzeş bolmaklygyň hakynda Hudaýa dileg et. Goý, nirede bolsaň-da, adamlar seni görenlerinde saklanyp, şeýle diýsinler: «Özüňiň bilýänleriňi bize-de aýan et. Sende näme aýratynlyk bar? Sende bar zatlara eýe bolmagymyz üçin biz näme etmelidiris?» Şonda sen özüňdäki nuruň çeşmesi hakyndaky hakykaty aýan edip bilersiň.

Geljekki ýagşylyklar üçin

Özüň üçin niýetlenen hyzmatyňy alyp barmaklygyňda geçmişiňiň kömek bermegini isleýändigi sebäpli, Hudaý seniň ýatlamalaryňy öçürip taşlaýan däldir. Ol seniň geçmişiňden iň erbet zady alyp, ony uly pata öwrüp bilýändir. Bu patany bolsa Hudaý saňa geljekde berer. Ol seniň Özüne bolan hyzmatyňyň esasyny berkider we şonda sen Onuň nuruny beýleki adamlara ýetirersiň.

Hut şunuň üçin hem Hudaý seniň öz ýalňyşlyklaryň arkaly öwrenmekligiňi we agyryly ýatlamalardan azat bolşuň hakynda beýleki adamlara hem gürrüň berip bilmekligiňi isleýändir. Ýöne Hudaý seniň öz geçmişiň bilen ýaşamaklygyňy dowam etdirmegiňi isleýän däldir. Öz geçmişiňi edil geljegiň baradaky pygamberlik hökmünde däl-de, edil geçmişiň baradaky kitap hökmünde okamagyňy isleýändir. Yzyňdakylaryň baryny ýadyňdan çykaryp, öňe ylgamaklygyň Hudaýyň islegidir (Filipililer 3:13 seret).

Köp adamlar özleri üçin Hudaýyň taýýarlan geljegine eýe bolup bilmeýärler, çünki öz geçmişlerinde berk batga batyp galýandyrlar. Bir gezek terk edilen adamlaryň durmuşlary muňa aýdyň mysal bolup bilýändir. Şeýle adamlar öňküsi ýaly ýagdaýyň ýene-de gaýtalanmagyndan gaty gorkýandyrlar. Olar beýleki adamlardan diňe erbetlige garaşýarlar we olaryň sözlerindedir hereketlerinde duşmançylygy görýändirler. Şonuň üçin hem olar gorkakdyrlar, mydama gaýgylydyrlar, öýkelenendirler we töwerekdäkileriň sözlerini agyry bilen kabul edýändirler. Başgaça aýdylanda, olaryň terk edilmeklikden gorkmalary özlerine bolan nädogry gatnaşygy görmeklerini döredýändir we olar mundan gaty gorkýandyrlar. Netijede bolsa, ýapyk zynjyr emele gelýändir.

Dileg